Oté

Zéro la gosh in shif !

Justin / 28 mars 2011

Si mi konpran bien, koméla, nana in nouvo kalité kandida : solon zot, bann bienfétèr l’imanité. Zot lé prézidan l’asosyasion, é l’asosyasion i prétan èl i vé lite kont la mizèr noir. Zot i distribyé koli. Biensir nana pou diskité la-dsi. Pars in sharité i ranplas pa la zistis, konm l’asistans i ranplas pa in bon partaz bann rishès.Touléka, mi kritik pa bann l’asosyasion é mi trouv, souvan défoi, zot lé bien nésésèr.

Solman, i fo konète si la pèrsone i monte in l’asosyasion i pans lé zot, sak lé dann la mizèr, sansa i pans ali, pans son l’anbisyon an promyé. Dé foi, sa i done inn-dé ga in léstati sosyal : mèm bann zournal, sansa bann radio, ou sinonsa bann télé i vien rode azot pou diskite déssi la mizèr d’moun. Si ou i fé pa antansyon, out shoviy lé riskab gonflé. Mèm ou i pé pran aou pou plis ké ou i lé. Konm di lo patoi : « Atèl in bourik avèk in kalèsh, ala ké li pran ali pou in shoval ! ».

Pli pir kan la pèrsone i fé la sharité d’moun, aprésa li port ali zéléksyon. Déssi Sintandré, mi koné o moins troi pèrsone konmsa la prézant kantonal. Konm na in pti zistis issi déssi la tèr, zot troi la gingn shakinn in batlavé. Solman, dézyèm tour, zot la ralyé lo parti Sarkozy, sansa la virapouli, lo parti la fé anou d’tord dépi in bon koup de tan. Dizon lo parti la kass sosyal. L’èr-la, la pa arienk shoviy la gonflé, la gonf partou. Bann zorèy i apèl sa in balon bodrush, pars moinn ti kou d’zépine, li fé pschttt.

Aprésa, pétète zot i kroi zot lé inportan, mé moin lé o régré dir azot, zot i rès in zéro la gosh in shif.

Justin


Kanalreunion.com