Oté

Zétazini l’Amérik ? In tigr an papyé !

Justin / 4 août 2011

Zétazini l’Amérik, sa in péi lé vanté oui sa ! Zot i parl ! Promyèr puisans nana dann lo mond antyé pou son lékonomi, shanpyon di mond in pé i apèl sa lib... Arzout èk sa son biyé vèr épi tout sak Jo Dassin té anvi an avoir kan li té i shant : « L’Amérik, mi vé avoir, é moin nora ! ». Zot i koné ossi lo rèv amérikin. Mé, konm di lo kont, tout kalité médaye nana son rovèr, é lo rovèr lé pa si tèlman valab ké sa avèk toussa bann pov nana la-ba, avèk son mani alé fé la guèr in pé partou, avèk son léspèss moral li l’apré mète an avan toultan...

Dabitid, konm di lo kont, la kord i kass koté li lé fay, mé so kou issi, sé koté l’i parète dir ké li l’apré kassé. Toudinkou, lo mond antyé i an apèrsoi, lo péi lé andété vèy pa koman. Plis katorz milyar dolar. Sa i fé in moné, mi pé dir azot, mèm si mi rann pa moin bien kont la kantité larzan sa i fé. Arzout èk sa, son l’andètman na in plafon li pé pa dépassé, sof si bann dépité èk bann sénatèr lé dakor. Donk, shak foi i ariv in n’afèr konmsa, i fé in spèss ralé-poussé. Mèm lo péi lé ménassé tonm an fayite. So foi issi, la tonm dakor pou rolèv lo plafon la dète, par-la dé milyar l’éro. Proshène foi va oir.

Zot i koné kossa k’i ariv dann in ka konmsa : i fé promèss diminyé lo bann dépans, pars in pé dmoun malfondé i vé pa rogoumant z’inpo bann rish. Dépans moin, mé si domin nana in katastrof, sansa si lo péi i rode fé ankor in nouvo guèr, kossa va éspassé, pou l’Amérik, pou toute lé zot péi li doi larzan ? Na oir sa, si nou lé ankor vivan. Mé plis i sava, plis ni an apèrsoi, bann péi rish sé d’fo rish, é zot krédi l’apré ral azot atèr. Konm Mao-Tsé-Toung nora di si li té ankor vivan : « Zétazini l’Amérik, sa in tigr an papyé ! ».

Justin


Kanalreunion.com