Oté

Zis in réfléksyon apré in nouvo mové kou : Zot va fini par konèt dann kèl boi nout pèp lé fabriké !

Justin / 15 mars 2012

Mi koné pa si moin la fine rakont azot z’istoir-la ? Si moin la pankor, zot va konèt ! Si moin la fini, mi pans va arfréshi zot mémoir. Sa i éspas pa dann in péi étranz ! Sa i éspas pa dann tan mon aryèr-aryèr té i marsh kat pat. Sa in z’istoir vré, dann tan l’avé la diktatir bann frodèr z’éléksyon, bann nèrvi épi la préféktir. Zot i koné, nou la viv o moin katorz-kin-z’an dann diktatir-la.

Donk, dann tan-la, in mèr Sin-Pyèr, demoun té i kriy ali Gro-ta, l’avé désid anpèsh bann kominis rant dan la méri épi bann nèrvi l’avé gingn lord prosuir tout kominis té i rant, kisoi pou gingn in bon roz, kisoi pou tir in dokiman l’éta sivil, kisoi pou d’ot rézon ankor. Sa lété fé pou kas lo rézistans nout militan. Mé in zour, troi militan la désid défyé la loi nèrvi, zot la désid rant dan la méri ; Tout suit nèrvi la rant dan la dans, mé bann militan té pa vni la pou zoué kanèt. In batay la pété, é bann nèrvi té pa paré pou pran lo dési. Biensir la loi la mélé, pa pou lo droi bann militan, mé pou karsèr azot.

In dirizan dann tan-la la di amoin li la gingn in pti bout papyé té i sort èk bann kamarad la prison Sin-Pyèr. Dési té marké : « Misyon akonpli, nou lé an tol ! ».

Sa la sèrv léson : demoun la désid ar-rant dan la méri é défyé la loi nèrvi. In léson pou yèr i vo galman pou zordi... Zordi, in pé i pans, tan lontan i pé rotourné. Zot i pé kas rézistans demoun, kas rézistans nout parti. Bin sak i kroi sa, i fo zot i rapèl z’istoir moin la rakont an-o la, épi d’ot ankor nout bann vyé dalon i rakont. Konmsa zot va konèt dann kèl boi nout pèp lé fé.

 Justin 


Kanalreunion.com