Oté

Zis pou in votaz. Pou in Rényon nouvèl !

Justin / 24 novanm 2015

Fi in tan, plito dann tan zané swasant kan té i ariv lo tan zéléksyon, antansyon pangar pou désertin, parl pi si ou té kominis. Minm si ou ravaz pa d’moun sinploman èt kominis té konm si ou navé la gal, in ryin di tou té sifizan pou fout in gomaz dann biro d’vot konm sa zot té lib pou fé bouraz lé zir aprésa. Si in moun té vé mèt in ot moun dann in gouni té zis sifizan pou zandarm kansèr a li. Kamarad i rakont byin “Té falé èt pouvréman bandé pou tyinbo sectèr èk banna “.

Si lavé in mové nouvèl, té mèt sa touzour d’si lo do kominis, si inn té gingn in kou d’kongn té la fot kominis. Sa lété pou, dann tan lontan. Yèr dann rènyon nout kandida sin Zozèf, mi apran la ba la mèri Sinn ni, banna la fé présyon d’si in madam, la tak son biro, la shanz son sérir, la blok son lordinatèr, boudikont la arsèl a èl ziska tan èl lé parti war in doktèr. Sa i éspas la mèri sinn ni zordi.

Sèl diféranz èk zané swasant, sé pou alé doktér, mazinn in kou, té konm avan, pou alé doktér té falé tir in fèy la méri èk lo mèr konm avan. Zot i koné kisa i lé lo mèr sinn ni ? Li lé dézyinm d’si la lis in madam, lo minm madam i prézid in lasosyasyon pou défann bann madam viktim zistoman. Ziska zordi mwin la pa antandi a li di in mo d’si lo takaz biro, sinonsa d’si lo sanzman sérir ou sinon d’si lo blokaz lordinatèr. Pou koué tousala ? Zis pou in votaz. Pou in Rènyon nouvèl !


Kanalreunion.com