Oté

Ziskakan li pans dsi nout fron lé marké kouyon ?

Justin / 10 avril 2012

Mi koné pa bien si d’moun i rann azot kont dann kèl l’éta La Rényon lé randi. Pou kosa mi di sa ? Pars mi oi pa dann bann program politik in vré program pou tir La Rényon dann fon la kivète. Sa lé vré pou bann kandida i port zéléksyon prézidansyèl. Sa lé pli vré ankor pou déssèrtin kandida i port zéléksyon dépité. I diré, déssèrtin i vé guéri in kansèr kout kashé l’aspirine. Dizon, in kotèr dsi in zanm de boi. Portan, moin lé sir é sèrtin, nout péi la bézoin in vré plan pou son sirvi.
Majine in kou près trant pour san d’moun lo nom lé marké dann pole anploi. Boudikont, kan i oi troi pèrsone dann shomin na laz pou travay, inn lé dann shomaj. Si kat san sinkant mil pèrsone lé an az pou travay, nana prè san trant mil, dsi l’fron lé marké shomèr. Majine in kou si La Frans té konmsa, konbien milyon shomèr n’oré ? Par-la, nèf milyon d’moun. Zordi na troi milyon é bann z’ékonomis i afole. Alor kosa i fé ? Kosa i fé pou bann Rényoné ? Sof mon réspé, in rézime lo tyède, sa lé pa asé. I fo in plan, mé in vré plan, pa pou fé sanblan, pa pou zoué èk nou.
Pli pir kan in pé, konm Sarkozy i pans li va règ lo problèm avèk in grin la défiskalizasyon, avèk la bès bann sharj sosyal. Pli pir ankor, kan li di ni baz dsi l’asistans é kan li arprosh bann Rényoné an avoir tro zanfan. Sarko, i fo bann zéléktèr i vir aou, pars ou na poin solisyon pou nou. Arzout èk sa, bann sosyété konm Air-France, sansa l’EDF- sa bann sosyété fransèz sa, mèm l’Etat lé propriyétèr !- i zoué kont nou : inn i soutien Air Mauritius kont Air austral, l’ot i fiziy nout l’otonomi énèrzétik. Parl pli bann sosyété konm Total èk lo tor banna i fé anou.
L’èr-la, mi domann ziskakan, gouvèrnman i sar roul anou an sharète shaviré. Ziskakan, li pans kék santène zandarm va règ nout kont. Ziskakan li kroi dsi nout fron lé marké "kouyon".

Justin


Kanalreunion.com