Zistoir dolo piman, lo mal épi lo bien

Mi koné pa si zistoir la lé vré ou sinonsa si li lé pa vré mé mi rakont azot kant mèm. I prétan dir, la-ba dann Sid in propriyétèr la désid, in zour pou maryé son fiy. L’èr-la in bonpé garson, kan l’aprann lo nouvèl, la anvoy zot domann mé la fiy la déklar èl lé pa intérésé par bann garson-la... Donk lo tan la pasé, ziska k’in zour, èl i désid par èl mèm aksèp la domann in garson té i sort in n’ot landroi ké la syène. Lo papa la done aèl son konsantman, avèk in gran morso térin par pou lo nouvo ménaj planté, pars sa té dmoun l’avé lo moiyin épi té i pé donn kékshoz konsékan zot fiy épi son mari épi z’apré la fé tout lo formalité d’ maryaj.

L’avé in bonpé dmoun zalou, sirtou bann garson té i santi azot afronté par lo refu d’domann maryaz. Lèr-la, inn dan la bann la désid vanjé é la parti, la nuit avan lo maryaj, vèrs in l’arozoir dolo piman sèk dsi la tèr damé dann lo sal vèrt… I parétré, kan maryaj la rantré é demoun la komans pil pilé l’ardèr piman la lévé si tèlman bann z’invité té blijé kite lo sal vèrt é l’amizman l’arète la mèm. La famiy lété dépité, la promète bann z’invité va rofé inn nos mé té pi sa, konm zot i konpran. Kan kékshoz lé kasé, lé kasé é lo fiy té i fini pi d’arète pléré. Si tèlman lo kontak avèk lo mal l’avé détrui aèl.

Kosa sa i fé pans amoin ? In zafèr bien aktyèl : moi d’mars lésans i sava rogoumanté é sar konmsa toultan, os-bès, os-bès é bann pétrolyé va fé la loi pars lo plan lotonomi dann l’énèrji in pé la kasé, sirtou lo plan solèy é bann pétrolyé i zoué èk nou konm i zoué avèk toupiy san naye. Pars in pé la rant dann zot trin olèrk tienbo lo rin dann l’intéré nout pèp.
Zistoir dolo piman, lo mal épi lo bien pou nout péi.