Oté

Zordi la pli, domin solèy ! Zordi mi li, domin mi révèy !

Justin / 2 avril 2014

Matant Zélida la ékrir Justin :

Mon shèr nové, mon spès salté rouj-de-fon dovan l’éternité,
Mi pé dir aou, mon nové, dimans soir, pou moin té in gran soir. Pou kosa té in gran soir ? Pars pou la promyèr foi, dopi in bon koup de tan, moin la vi zot parti kapote dann kanal. Fransh vérité, sa i fé d’bien oir in n’afèr konmsa : zot la pèrd Sint-andré, Sin-Pol, Sin-lui, lo Por, Posésyon… Sint-Sizane osi la mank kapoté. Pandan éstan-la, la droit té anlèr é té i rèv arienk in n’afèr sé manj bann sosyalis tou kru konm la manj lo kouran bann rouj de fon. Ou i trouv in lésplikasyon pou in n’afèr konmsa ou ? Biensir, konm ou i di, ou i pé koz la boush rouvèr, pou ésplik, san éspliké, tou an ésplikan, mé sa i shanj pa la réalité. tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr,
Mi antann bien sak ou i di. ou i lir lo bann rézilta é ou i pans dann out kèr lé fini avèk nou, mé pran pa out dézir pou la réalité. In parti la fé in bon bout nout listoir, i disparète pa konmsa. Shak foi nou té dann difikilté, nou la nyabou ansort anou é so kou isi sar parèy ou va oir. Pou kosa ? Pars lé vré nou na problèm zordi, mé lé vré osi La Rényon lé dann in sityasion difisil é èl la bézoin demoun na in program é konm mi di touzour nout parti na lo méyèr program. Donk, na in zour i apèl domin, nout parti rényoné va arlévé avèk son program, avèk son l’amour pou nout ti nasyon, avèk son volonté pou lité pou nout libérasyon par raport lo néo-kolonyalism. Konm di Ziskakan : « Zordi la pli é domin solèy ! zordi mi pliy, domin mi révèy ! ». Nout parti lé konmsa. Ou i vé ! Ou i vé pa !Tok ! Pran sa pou ou !

Justin

NB Mi souvien lo tan parti kominis n’avé pi in sèl moun élu mé li té touzour dann kèr nout pèp. Mi pans oir nout gran rotour, inn foi ké nou sar fine bien rékonsilyé avèk nout pèp, inn foi nou sar fine bate atèr nout divizyon rantre nou.


Kanalreunion.com