Oté

Zordi la pli, mé domin solèy !*
Zordi mi pliy, domin mi révèy !

Justin / 23 zwin 2012

Mèrkrodi soir dsi Rényon-Promyèr, l’avé in sobatkoz rant bann zournalist. Sétaki té apré asplik l’aktyalité. Inn-dé té apré fé lo konésèr. Inn dann ta té apré ésplik pou kosa, solon li, Parti kominis rényoné lé fine mor, é kan ou lé mor, ou lé bien mor. Bon ! Nou va oir dan l’avnir, pars mi koné la pa promyé foi nout parti i afayi, mé aprésa li roviv, li rofé. Konm Madoré té i di : « In pé té i kroi moin lé mor, sé l’èr k’moin la rotourn ankor. L’èr k’moin nana dan mon kor la ramène amoin dsi la pant nonor ! ». Mèm bann gran doktèr, bann gran konésèr i tronp azot souvan dé foi. Touléka, zot kozman lété in pé tris, in pé pov, in pé ignoran dan la plipar dé ka. Soiré-la té tris, mi pé asir azot !

Toudinkou la shanj l’émisyon, la pas in téléfilm té i parl la vi in onm, in vré, in rézistan pou vréman. Kisa i lé boug-la ? Simon Lagarrigue, shantèr maloya, in moun la fé parti la troup rézistans, in militan politik. L’ékran télé la kléré. Avan li, fénoir ! Avèk li, lo zour la kléré. Mi koné pa si sa l’ariv konmsa san fé éspré. Mi koné pa si in l’éspri malin la pous lo disk dsi la mashine, mé touléka, sa l’arivé. Boug-la, konm in pé i di, la pèrs lo l’ékran. An dé tan troi mouvman, li la amontr anou kosa lété la vi in kominis, kosa lété la vi in travayèr dann tan Perreau-Pradier épi apré dann tan Michel Debré. Arzout èk sa, la vi in famiy kréol, avèk sèrvis tamoul, l’élvaz z’animo, bate karé, épi réfléksyon dann in l’izine abandoné ; La vi in famiy avèk momon, papa, z’anfan, p’ti z’anfan, é dan tousala, la vi an rolasyon avèk nout parti, nout Parti kominis rényoné.

Avèk téléfilm-la, sak la di avan, tout prévizyon dsi la mor nout parti... tousala té fini oubliyé. In parti la fé dmoun konmsa par dizène, par santène, par milyé, sa i mor pa konmsa. Li tonb... oui, li pé tonbé, mé li arlèv. Konm té i di dann tan : ali mèm tonbé lové ! Zordi la pli, é domin solèy ! Zordi li pliy, domin li révèy !

NB : Parol Ziskakan 1982

 Justin 


Kanalreunion.com