Oté

Zordi lé tan, domin lé riskab tonm tar !

Justin / 27 out 2010

Nana in pé i s’anfou listoir in péi, i s’anfou listoir in pèp sirtou si sé pa sète in gran nasyon kolonyal. Ni koné ké pou in pé, bann ti-péi, bann tizil na poin listoir. Sansa, si na in listoir, sé in listoir insignifyan. Dizon shakinn i pans konm li vé ou byin konm li pé. Konm di lo kote, na poinn loi k’i interdi la kouyonis. Mé konm di lo kont, in kouyon lé danzéré.
Mi vé anparl sak l’ariv la-ba dann Sin-Filip. Zot i rapèl la komine l’avé in térin é téi vé fé lozman sosyal. Pou fé sa, téi fo shanboul toute lo térin konm d’abitide, san fèr in konte avèk landroi, san étidyé konm byin antandi si la poin in n’afèr intéréssan pou nout patrimoine. Si tèlman k’la raz lo mir in vyé-lansyin simitir. In pé i di la kass lo vyé mir, d’ote la di l’arash bann tonm. La komine, la onte déssi li ; la mète in léspès baraz an riban pou anpèsh lo moun gardé ; zordi, in pé i krin lo landroi lé inportan par raporte nout listoir.
Akoz ? Pars, simitir-la lé vyé, épi i fo pa rogarde aryink anndan, pars déor souvan-défoi téi antèr bann moun san foi ni loi ; téi antèr ossi bann zéslav afranshi, pétète galman bann zésklav tou-kour. Zot i konpran si lé inportan pou étidyé in n’afèr konmsa. Dann in tonm nana lo kor, mé nana ossi bann toil, épi bann z’obzé lo défin té i itiliz souvan. Kan la fine antéré, i antrotyin la tonm, épi pétète, i mète dossi la boisson lo mor té i èm, lo manzé li téi profèr, épi toute sort de shoz. In bon listioryin, in bon arkéolog i nyabou fé koz ali, pou démay lo passé.
Sé pou sa kan la sénatrice Gélita Hoarau, ou sansa Aline Murin-Hoarau i domann in sèrvis larkéolozi issi, épi in travay klassman, é toute sak i sav avèk, zot na rézon : listoir fé pa sa konmsa, an gro doi, an malprop, an kass-kassé, an makote, an sharète shaviré... san konète lo métyé, san konète lo bannn téknik. Toulmoun i koné zordi lé tan, domin lé riskab tonm tar !

Justin


Kanalreunion.com