Oté

Zordi travayèr lé bandé an 36 !

Justin / 31 mars 2016

Zordi sindika la di konmsa “lèv pa travay“ pou di ni vé pa la lwa el-konmri, la lwa pou kass lo kod du travay i di. Minm si shakinn néna son kililik, sanm pou mwin zordi lèr lé pliské grav pou lo moun ki travay, zordi travayèr i zoué gro larzan d’si son l’avnir, kiswa travayèr pou de vré, sak néna in travay an kontini, kiswa bann travayèr an roshèrs d’anplwa, kiswa bann shomèr long diré kiswa ankor sak i sa lékol ankor pou travay domin.

Si ni bouz pa lèr la, nou sar kit pou nout biskui, vik ziska zordi lo travayèr lé in pé protézé èk lo kod. Lo kod la, sa la pa in nafèr nou la trouvé in zour dann fon larmwar, lo kod i tonm lo résilta la lit bann avan, dopi lontan minm, dopi 36, dopi lo fron, zot la konpri, lo fron popilèr, aprésa firamésir la mélior a li, déza pou mié kad lo patron, é pou mié protèz lo travayèr sirtou. Sinonsa, si navé pwin lo kod lo patron noré règn an ségnèr.

La plipar d’tan, sak lé dodan lo kod aktièl, konm mi di pli o, tousala travayèr la gingn ti-ginn par ti - ginn, la pli par d’tan èk la gosh, konm mi di, déza an 36 lo kod la gingn in bon lavansman èk in bon dégrosi, aprésa an 81 la apropté ziskan 2oo2, la pran lo tan pou fé tousala. Mank do po zordi sak la gosh la fé “la gosh“ i vé défé, lété san kont èk bann travayèr. Ni pé konprann zordi poukoué néna d’moun dann shomin, a koz travayèr lé bandé an 36 ?


Kanalreunion.com