Oté

Zordu moin la ramas mon zanbrovat, mon zantak, mon chouchou

Justin / 31 mé 2014

Normalman, si lo bononm i plant, lo fanm i doi ni rékolté ; po planté, i fo défrisé, nétoy térin, mèt prop, pran lo pios, fouiy tout bann trou, mèt la sann, fimié, lo grin, agard si i giny dolo, sinon fo arozé, anlèv mové zerb, mèt inn ti pé langré (pa tro), bon, aprè i fo ankor bité po bann plant bien pran rasine, mi estim aprè tou sa la, si i res riink po ramasé, mon fanm i ginye ni trapé ; sé konm in kado mi of a èl, sa la pa in kado asté magazin, anbalé 50 éro ; non, sé la valèr mon sièr, mon travay, mon soufrans, mi fé konm zézi kris, mi souf po lé zot !!oté i fo l fèr !

Di pa moin, mi lé matcho ; non, sé in répartision tash, sakinn lé siinn ; a moin mi plant, mon madame i rékolt ! la pa bon ?
La pa lontan té la fèt dé mèr ; mi fé mon zoli kèr.
Dan in lorganizasion sosial, toulmoun i pé pa fèr tout ; konm di lot, ti pé pa ét o four é o moulin !
Bon, so matin lo monmon i ardi sé lasansion ; nin pé la mont Maïdo, avan Monsénièr té mont Piton dé Nèz (an éliko) ; lé vré, difisil mont pli o la Rényon !
Donk, marmay i suiv ankor formasyon la Rolizion, i di na la mès…

Foutor, a moin blizé fé tout ; rod lo fé antibrouiyar mon loto moin la pèrd dan boi ! Ramas chouchou dann sak ; é mounoir nana chouchou, na lo blan, lo ver, sak fine tonbé sou bann liane, la po zermé ; domaz, mon fanm pa la po voir koman son mari i travay po nouri fami la !
Bréd mi kas pa zordu ; lot koté zanbrovat la po séché si lo pié ; minm zantak, na kalité grap lo gous, bel bel grin, mèt tout dan lo sak ; mèt si lo moto, la kaz va trié.
Talèr nora po vann !?
Nou la pa bozoin traktèr, bildozèr, ék la min nou giny fé tou sa ! Viv Justin !

Justin


Kanalreunion.com