Oté

Zot i anparl pa , é zot i tronp lo pèp ! Lo pèp lé pa prévni dsi lo danjé !

Justin / 24 zwin 2015

Matant Zélida la ékrir Justin :

Mon shèr nové, mon spès salté, rouj-de-fon dovan l’éternité… I di pa Paul Vergès lé kalifyé dsi la késtyonn l’anvironeman isi La Rényon, mèm dan La frans é son bann kourtizan i anparl ziska pou lo mond antyé. Poitan mi antan pa li boujé moin ! Mi antan pa li déklar konm li na l’abitid, la patri natirèl lé dann danjé. Alé joué kanète don ! Tout sak li koné sé tourn son fime ! Tok ! Pran sa pou toi.

Justin la fé pou répons :

Mon vyé matant k’i koz toujour la boush rouvèr, sé pa aprs la télé i done pa li la parol ké li fé pa arien. Figir aou, matant, dopi l’ané 1996 Paul Vergès i tir lo signal d’alarm dsi lo réhofman klimatik. Pèrsone la pa fé in ka ! Mèm in pé la di parti kominis la pèrd la boul ! Rézilta : la pèrd lo tan olèrk pran lé dovan dsin problèm grav konmsa ! Tok ! Pran sa pou ou !

Matant Zélida la arvir ali :

Mé kosa li fé astèr ? Sé sak li la di l’ané 1995 ké sé son loi, donk plito ké rogard an avan, li pass son tan a rogard déyèr. Tok é rotok ! Pran sa pou toi !

Justin la fé romark ali :

Matant Paul Vergès té sénatèr é sé li k’la di bann fransé i fo pran prékosyon, pa pèrd lo tan, pars sak i ariv lé grav. A partir d’la, shak ané konm prézidan l’onerc li la fé in bèl rapor pou lo gouvèrnman k’i soi la gosh konm la droit, é shak foi la pa in kayé san paj mi pé asir aou. Plito dis foi plis ké sa !.. Lé vré isi La Rényon, bann gran médya i anparl pa ! Zot i préfèr kashyète déyèr z’ot ti doi plito ké oir la vérité an fas. An plis ké sa, la popilasyon lé pa informé é sa lé pa bien in n’afèr konmsa ! Tok ! Pran sa pou ou !


Kanalreunion.com