Oté

Zot i koné lo romans : « Dsi l’pon di nor in bal lété doné ! »

Justin / 22 octob 2014

Matante Zélida la ékrir Justin :

Mon shèr nové, mon spès salté, rouj-de-fon dovan l’éternité,
moin pèrsonèlman mi oi pa kosa k’i pé roprosh mésyé Didier pars si na in bon prézidann konsèy réjyonal sé bien li é mi oi pa kisa myé k’ li la mète La Rényon anlèr, komsa-la. Lé vré, li la pa rode paradé initilman, mé zour apré zour li amenn son bato konm k’i fo é si i lès ali lo tan, mi pans li va fini par shanj figuir nout pti péi. Majine in kou lo NRL, lo bann mizé, épi la rout dopi sin-Pyèr ziska Sin-Bénoi, san konté tout la Rényon ékipé an lordinatèr, épi tout rényoné apré voiyajé an parti avèk lo fré d’la prinsès. Koué d’myé ksa ? Ksa i pé fé myé ksa ? Konm di lo shanté dann soiré dansant : "Sak i fé myé ksa, lè lo doi !". Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr,
Moin lé bien kontann antann sak solon ou, mésyé Didier la fé ou sansa va fé, mé solon moin i mank kékshoz la-dan, i mank lar égzanp l’éta La Rényon épi l’éta dson finans kan mésyé Ddier va kite konsey réjyonal. I mank ankor lo l’éta li va lès Air Autral kan l’èr v’arivé pou li alé. I mank sirtou konm di lo kot lo bann katédral kasé li va lès an plan kan li v’alé... Va arès osi toiut sak Paul Vergès la mète a n shantyé épi lo Didier avèk bann sosyalis la déside kasé. Ousa sar l’otonomi dann l’énèrji ? Ousa sar lo tram-train ? Ousa sar lo droi voiyajé bon marshé ? Ousa sar l’otosifizans alimantèr ? Dann kèl l’éta sar la kopérasyon rant nou épi bann péi l’oséan indien ?. Somanké, va rès anou arienk pou shanté in nouvèl vèrsion « lo pon di nor » la plas lo NRL. Tok ! Pran sa pou ou ! Mète out moushoir par dsi.

NB in kozman pou la rout : « gronouy k’i vé ète pli gro k’in bèf ! ». Zot koné fonnkèr La fontaine i parl dé sa ? Lo zistoir lé sinp, sé sète in gronouy. li oi in bèf pasé él di dann son kèr si mi yinbou gonf amoin avèk l’èr, lé sir ké m’a gingn trap bèf la ; késtyonn grosèr. ala ké li gonf, li gonf, li gonf mèm ziskatan son vant i pète. kosa ni pé tir konm loson ? Sinploman k’i fo kontant ète konm ou i lé é pa rod ète pliské ou i lé pars ou lé riskab ramas l’annuiman. Sak in bèf na lo droi fé, in zèf lé pa otorizé.


Kanalreunion.com