Oté

Zot na lo drwa di “Komans déza donn légzanp“

Justin / 15 séptanm 2015

Dolo sé déza in problinm pou désertin péi, é èk so mafouti shanzman klimatik i riskab i dovyin ankor plis rar. An parmi bann migran, i di néna minm i kit zot péi zistoman par rapor dolo. Lé vré, o plis i fé sho, o plis domoun i bwar dolo, é o plis domoun i bwar dolo, o plis i fo an awar d’lo, é o plis i fé sho o plis dolo va manké donkalor to ou tar dolo sar konm korn lapin èk so mafouti sanzman klimatik. Sé in pé pousa ké la frans i organiz la cop21 fin d’lané. Pou sa, mé pa ryink pou sa.

Vik tousala i éspass an frans, la frans i roswa tout bann shèf déta, néna 195 é sé la frans ki asir la prézidans. Trwasyinm fwa néna sa, lo promié fwa sé dopi 1997 èk lo protokol kyoto, lo dézyinm, an 2009 èk lo somé kopénag é la a parti 30 novanm 2015 ziska 11 désanm 2015 sé la cop21 a Pari. Boudikont sé pou an awar in akor rant tout péi, pou sèy kal lo réshofman global an d’sou 2 dégré. Sé in gran résponsabilité pou la frans pou ariv o bout.

Déza an 2009 dann lo protokol kyoto, la frans la pran in langazman pou diminié lo to co2, sanm pou mwin la pa tyinbo la rout, zordi la frans i dwa absoliman donn légzanp an promié. Ek la rout ki sar fé si la mèr la Rényon, sanm pou mwin, ni roul in pé an kontrosans, ni sar ankouraz domoun asté loto, va dégaz ankor plis co2. Zis pou rir, si inn i sar vann la mèsh la ba mwa désanm ? Si inn an parmi lo 195 bann shèf déta i di“komans déza donn légzanp“. Zot na lo drwa !


Kanalreunion.com