Oté

Zoué lo rol gouvèrnèr !

Justin / 12 zanvié 2011

Matante Zélida la ékrir Justin :
Mon shèr nové, mon spès salté,
Kossa mi antann dir ? I prétan, koméla, bann rouj-de-fon i trouv a rodir déssi voiyaz lo prézidan dann la Martinik épi la Guadloupe ? Dizon, zot l’apré rode lo pou dan la tète la poin shové ! Pars mi oi pa pou kossa prézidan la Répiblik i vienn ar pa déssi téritoir fransé ! Kansréti pou souète son bon vé. Tout fasson, i fo li vien. Paryé si li l’avé souète son bon vé la-ba dann Paris, zot nora pa été kontan ankor. La i trouv i gaspiy larzan ! I amène in tripoté d’moun na poin arien a fèr dann l’outre-mèr. Rozman prézidan i pran pa l’èr avèk zot, ké zot i vé, ké zot i vé pa. Tok ! Pran sa pou toi.

Justin la fé pou répons :
Mon vyé matant k’i koz toultan la boush rouvèr, Ankor in foi ou nana out prop manyèr oir lé shoz. Ou la pa ékout son kozman don ? Ou la pa bien antann sak li la di, i fo kroir ! Ou la pa antandi ali dir, lé normal li raz la pinte bann moun l’outre-mèr, pars i fo zot ossi i pèy kan nana problèm larzan dann la famiy. Sof ké nou lé pou arien dan son politik pou soutien bann bank l’amène zot z’afèr an sharète shaviré. Sof ké, la pa la fote bann ti-kolon l’outre-mèr si lo prézidan l’amène in politik an favèr d’bann rish ! Arzout èk sa, li lé mèm pa rogardan si nou lé dann in sityasion lé pa komode ditou. Armète la-dsi ké li la promète anou, dann déssèrtène sityasion, lo préfé i pé pran la plas bann z’éli. Donk zoué lo rol gouvèrnèr !

Justin


Kanalreunion.com