Oté

Zour apré zour, mon l’amour pou mon péi kréol la grandi

Justin / 28 zwiyé 2016

Mi souvien kan in profésèr l’inivèrsité la invite amoin donn kour kréol rényoné dann inl’institi l’inivèrsité. Mi pé dir azot mon kèr té pa trankil si tèlman moin té i dout de moin. Moin la komans par fé lo tour mon bann konfyans pou domann azot si lété in afèr fézab. Biensir zot la di amoin sa té in n’afèr fézab ! Mé mon késtyon l’été pou savoir si in moun konm moin té i pé fèr in n’afèr konmsa. Biensir pou zot, si moin té i vé vréman moin té kapab fèr in n’afèr konmsa …

Aprésa moin la koz avèk lo profésèr.L’èr-la lo profésèr, in gran dalon avèk moin zordi, la di amoin son bann z’amontrèr la pa in bann profésèr pou vréman : sak té i amontr vietnamien lété k’i élèv moush-a-myèl é té i antrènn fotbal, sak té i ansègn lo zaponé lété i fonksyonèr la préféktir, sak té i ansègn malgash lété in profésèr fransé, é tout lé z’ot lété konmsa... Mi pé dir azot moin la transpiré, moin la aprann é moin la aprann amontré : amontr bann z’étidyan nout lang kréol rényoné, son gramèr, é son vokabilèr é son manyèr ékrir, nout kiltir popilèr avèk zistoir kréol, provèrb kréol, kozman kréol. Boudikont mi koné pa si lo bann z’étidyan lété kontan pou vréman, mé mi koné moin la fé sa, pandan plis douzan é mi pé di shak jour moin la aprann in n’afèr anplis .

Mi souvien konmsi l’été yèr, kan pou donn amoin kouraj, lo profésèr la di amoin : dsi la tèr, shakinn na son talan é si ou nana lo talan d’amontrèr ou va rann aou kont an vitman... mi koné pa si moin l’avé so talan-la pou vréman, mé sak mi koné sé ké zour apré zour mon l’amour pou mon péi kréol la grandi ésa sé in n’afèr valab pou vréman.


Kanalreunion.com