Oté

Zourné internasional kréol : In n’afèr bien solid, in n’afèr bien dirab !

Témoignages.re / 28 octob 2013

Zordi lindi 28 oktob, i tonm la Zourné internasyonal kréol. La pa zordi, ni fète sa pou la promyèr foi. Si zot i vé, i fo ni romont l’ané 1981 : dann tan-la in komité internasyonal bann zétid kréol (comité international des études créoles) la réini la-ba Sint-Lusi. Zot bi : lans l’idé in gran mouvman bann shèrshèr nés dann péi kréol. L’èr-la, zot la mète anlèr lo mo "Bannzil Kréol". Moin la lir par-la lo moun la lans so lidé-la, épi la invant lo mo lété Jean Bernabé... Moin, pèrsonèl moin té pa la, épi si moin la konète konm in pti trépé d’moun sèt afèr-la, mi pans nou la pa fé tro in gran ka èk sa... Mé, konm i di, lo grin planté la tonm dan la tèr fèrtil é pa dann rosh piké, li la bien pousé é ni koné zordi, bou di kont, sé in n’afèr inportan pou tout péi kréol.
Lé vré ké bann shèrshèr kréol té i oi loin : zot l’avé an poinn vizé in gran lorganizasion intèrnasyonal é sa la pa marsh konm zot i voulé. Mé anon in pé pli loin dann lo tan : l’ané 1988, isi mèm La Rényon, bann shèrshèr la fé in léstati épi la dépoz sa Sind-Ni. Nana dé nom ladan : in Rényoné i apèl Alain Armand épi in Séséloiz i apèl Danielle de Saint-Jorre... in tan èl lété minis la Kiltir dann Sésèl. L’ané 2005, bann Séséloi la dépoz in n’ot éstati dann zot péi, in l’asosyasion suivan lo droi Sésèl. Son prézidan zordi sé Patrick Nanty épi son vis-prézidan Raphaël Confiant... Zis dé pti mo pou rapèl in pé lé shoz, mé lé sir si zot i vé myé konète i fo alé dsi internet é si posib koz avèk bann moun isi La Rényon, konm dann Sésèl ou sinonsa dann d’ot péi la zoué in rol la dan.
Moin lé sir, in pé va di ankor sa sé in bann révèr. Mi pans in pé lé riskab di bann shèrshèr l’avé lo tan pou gaspiyé. Mé moin pèrsonèl, mi pans sa té in n’afèr itil é mi pé di osi banna la pran zot par dann la défans bann lang kréol. Mi pé di osi dé foi na dmoun i artrouv azot dann karfour listoir. Sé lo azar ? Mi pans pa. Sé zot mérit ? Konm di lo kont zot lété landroi ki fo kan téi fo, par zot prop volonté. Touléka, parol d’onèr zot la pa bati lo kaz dsi la sab ; mé plito in n’afèr bien solid é bien dirab.

 Justin 


Kanalreunion.com