Culture et identité

« Nou va kontinyé travay »

Jean-Yves Mitra : président du Comité de Moringue de La Réunion

Jean Fabrice Nativel / 22 décembre 2010

Jean-Yves Mitra la pass in bon 20 Désanm an famiy, antre ami. Nou la domand a li si li lavé in ti tan pou akord nou. Li la di a nou oui. Nou la profit pou domand o nouvo é présédan prézidan Comité son bilan é sak li kont fé pandan son mandatur 3 zan.

Jean-Yves, kosa ou la fé pou lo 20 Désanm ?
— Moin la fé mon 20 Désanm, moin la u in pansé pou nout zansèt libéré, moin la dansé, moin la manjé, moin la fèt pou moin.

Di a nou in pé plis.
— 20 Désanm, sé la fèt la liberté, mé kèl liberté ? Mé ès-ke nou mèm nou lé libéré ? Zordi na lèsklavaj modèrn. 20 Désanm zordi lé pi kom avan ou dan chak kartyé navé in lanimasyon. Zordi, chak méri i vé lo méyèr group. I fo nou rouv lo zyé. 20 Désanm lé dev’nu in biznèss. Na sèrtin vil kom Sin-Pol, Sinte-Roz i gard la tradisyon. Sin-André, Sin-Pyèr la fé in konkour maloya, lokasyon mèt a zot an valèr.

« Tout komba lé lyé »

Moring èk maloya lé lyé ?
— Na domoun i sobat pou maloya. Na domoun i sobat pou moring. Na domoun i sobat pou nout Listoir. Sèt ané, moin la rankont in gran mesyé i apèl François Saint-Omer, sé in modèl pou nou, li la batay pou la rokonésans la lang kréol. Na dot kom Danyèl Waro é dot ankor ké nou oubli pa… Tout komba la lé lyé. Chakèn i amèn son manyèr. Solman, i fo nou gard nout tradisyon.

3 zané rich

Na poin lontan d’sa, ou la été réélu prézidan Comité de Moringue de La Réunion, kosa la mark out manda…
— Nou la mèn in bon pé laksyon mi pé di a ou :
• le voyaj Brézil la été in défi pou nout comité, dayèr mi romèrsi lé kolèktivité ke la èd a nou anmèn 14 pèrsone,
• le voyaj Martinik avèk Jean-René Dreinaza,
• le voyaj moringèr Lo Port an Chine,
• le voyaj moringèr Simangavol an Afrik,
• linogurasyon Centre régional de boxe française et moringue de la Marine (Sinte-Sizane) ou nou mèn in travay si lo lon tèrm,
• léchanj avèk lil Rodrigues, lé Rodrigué dan moring la trouv in nafèr i plé a zot. Nou kontinyé nout travay avèk zot é dan loséan Indyin,
• le tournoi à La Roche-sur-Yon ou sa David Mazagran lé animatèr dan kartyé,
• louvèrtur lékol moring Kamélya, Sin-Josèf, Troi-Basin (pou lané ki vyin lé prévu sak Sin-Leu é sak Sinte-Marie),
• la rich journé sportiv,
• la conférans a Paris avèk Jean-René Dreinaza,
• navé 250 moringèr dan la Vil Sin-Dni.
• la final a Troi-Basin ou nou la fé konèt moring dan lé o.

Sa mèm ?
— Na osi spéktak ke David Testan èk Ludovic Patchapin i fé avèk Lindigo. Na in la u Seychelles. La prèv ké maloya lé lyé ansamb moring.

« Kontinyé travay »

… é kosa zot i kont fé pou 2011 ?
— Nou la gard la mèm ékip avèk la v’nu d’nouvèl pèrson. Nou kont kontinyé travay pou dévlop moring dan’d La Rényon é dan’d loséan Indyin avèk in gro suivi si la compétisyon.

Zordi na in bon pé jeun i pratik lo moring, dapré ou pourkoi ?
— Dan’d laktivité moring, lo jeun i dékouv son Listoir, pèrkusyon, la dans, lar kombat, la gym… I sédui a li.

Na in bon pé fiy osi, koman ou èsplik sa ?
— Avan té i di, pou fé moring : « I fo èt in kok ». Kom mi di a ou, tout kalité domoun i fé moring. Sin-Pyèr, na in lékip Maoré, Sin-Dni, na in musulmane, na osi d’métro. Lé rouvèr tout domoun.

Nou lé dan tan lé vé, lé vot sé lékèl ?
— Bone fèt tout domoun La Rényon, lé moringèr. Nou lé in èkzamp pou tout péi, na plizyèr rolijyon, sa i fé nout fors… Mi domand moin’d gèr — mi domand a moin ki i tir lé fisèl.

« Na d’moun i vé voir moring disparèt » !

Domoun i di ke « na d’moun i vé voir moring disparèt » ! Sé sak i di an kouliss. Na mèn lankèt pou savoir kisa i di sa. Sak nou pé dir a zot, lé pa domin la vèy. É si jamé lé vré. Lo pèp Réyoné i vèy a zot. Dayèr i s’ré pa lo promyé foi domoun i vé sa. I fé pa rapèl a zot sak i voulé fé avèk maloya ke lé devenu patrimoine mondyal limanité. A fors joué avèk lo fé, zot va bril a zot ! Nou koné ke le mésaj i sora transmi kom i di a ki de droi.

An atandan, yèr apré-midi, Jean-Yves Mitra la rankontré dalon moringèr Diego (Madagascar) an rézidans avèk Kozman ti dalon. La été lokasyon d’kozé avèk « maître Aboudou » ki koné byin La Rényon. Kom koi le moring na ankor d’bo jour dovan li.

Tèks é foto Jan-Fabris Nativèl

Contact
Jean-Yves Mitra : 0692-72-19-57


Lé randé-vou

• Janviyé : in rassambleman dé moringèr pou fé la fèt*.
• Févriyé : in invitasyon a Lille otour din tournoi*.

* Nou va tenir a zot o kouran dé dat.


Kanalreunion.com