Culture et identité

Tir kouvèrt si nout zistoir, aminn téat dann somin

Nouvelle apparition des "Légendes créoles" de Daniel Honoré

Témoignages.re / 10 mai 2004

Na domoun i sava pa ankor dann téat. Sé pou sa, lo Théâtre du Grand Marché la parti zwé “Doktèr Kontrokèr” si koté z’Avirons, Saint-André, épi dann kartié Chaudron. Là na domoun dizon la vi in piès téat pou promyé kou. Ahmed Madani, diréktèr lo téat, la anvi done azot ankor plis lo gou, koma domin zot va pa ézité nir dan in sal téat.
So kou si, apré lo tèks Molière, sé sat Daniel Honoré i sa vavangé. Leu Tempo Festival la résèrv in landroi pou bann 6 komédien si fron d’mèr Saint-leu. Shak rakontèr d’zistoir i sa assiz sou filao, dann gazon, pou ramass mantèr. Pourtan zistoir zot i rakont la pa zistoir marmay, sé bann zistoir gramoun la fé pou nou. Sé bann zistoir gramoun la tandi dopi étan ti é ki rakont pi nou tro, akoz lo post télé i tourn an ron.
Asiz anparmi domoun, Virginie Darmalingom i sa rakont "Bondié dan la glas", Mickaël Fontaine "Doub kot, froté èk gramoun". Inn ot koté, Eric Isana va di azot lo vré zistoir Sitarane. Inn ot moman va ni lo tour "Madam Débasin", Jocelyne Lavielle va di azot tout. Ketty Lisador va di azot ankor lézann "Wi !" é sirtou la vré vi é la vré mor "Gran mèr kal". Rachel Pothin va rakont bann zistoir "Lo trézor" sanm "Dèy Marsélin". Nout bann “Lézann Kréol” i sa rofé in laparision. I sa tourne déor, i sa dsann dann somin, i sa mont La Plaine des Cafres, repik si Saint-Pierre. Pou lèr, i sava la kaz domoun, Chaudron, Mafate (guèt parkoté).

Shakinn son vérité

Daniel Honoré la trape lézann-là dann la boush rakontèr d’zistoir, pou mèt azot si papié. Zordi li lé kontan, na d’rakontèr i mèt in kozé si son modékri. Pou li, s’ré méyèr ankor si tout bann gramoun té giny lanvi rokomans déliv zot sékré, rakont zistoir pou zot ti-zanfan. Parlfèt, so l’ékspérians téat i done la min in tradision lontan la fé bat lo kèr nout péï : la véyé. Lèr toulmoun té assiz otour lo krakèr pou akout son kozman. La vré la pa vré ? Son zistoir. Ni kroi, ni kroi pa, kap-kap si nou kan i koz bébét. Fo nou pran lo tan ékout ali pou lés ali ral anou.
Son zistoir i koz, i koz ék nou-minm. Sa zistoir nout péi, i port mazinasion popilèr. Kom i di Daniel Honoré, tout bann Rénioné la ariv la Rénion sanm tout in gran kiltir, bann gran mitolozi... Zistoir banna la fé ansanm i aport in zafèr nèv. Bann lézann i done anou in ot manièr vizit listoir nout péï. Lézann kom in mémoir. Lézann kom in miroir ousa ni guét nout lidantité kréol. I koz pa ou la moral, i amont la manièr ni pans lo monn, la fason ni voi la vi. I tir kouvèrt si sak i fé anou.
Épi shak rakontèr na son manièr rakont zistoir. Épi shakinn i trouv in sans diféran, shakinn i trouv son vérité. Lo rakontèr, ou lo rakontèz, i pran lo zistoir pou li. Zordi sé son zistoir. Sak va nir ékouté va pran lo zistoir pour li, sra son zistoir.

Eiffel


“Légendes créoles” : itinéraire

Six comédiens du Théâtre du Grand Marché se font éveilleur et raconteur d’histoire, en puisant parmi les "Légendes créoles" collectées par Daniel Honoré. La troupe itinérante se produira hors les murs et chez l’habitant gratuitement :

- à Saint-Leu, Leu Tempo Festival, mercredi 12 et samedi 15 mai à 17 heures (tél : 0262 34 31 38)

- chez l’habitant au Chaudron et dans le Bas de la Rivière du 17 au 28 mai,

- Théâtre de verdure du Chaudron, samedi 29 mai à 19 heures (tél : 0262 20 96 36)

- Mafate vendredi 4 juin à 19 heures (Aurère) et samedi 5 juin (Ilet à Bourse) (tél : 0262 20 96 36).


Kanalreunion.com