Hommage

Gran mersi Madam Baba !

Témoignages.re / 9 zwin 2014

Kan in moun i kass lo kwin, nout kèr i plèr. Po rézon, li lé pi la. Nou vwa arpi, nou toush arpi, nou koz arpi ansanm. Mé si nou gèt byin, si nou akout byin dann nout fonnkèr, saspé – mé lé pa sir, nou pé vwar lo moun i viv akoz nou yinm ali, akoz li la sitantèlman fé ké li sra la po toulbon, po toultan.

Madam Baba la désot la vi dimans 8 zyin mé el i viv é va viv ankor lontan akoz son kèr té dou, akoz son léspri té vif é sirtou li la doné zisko dernié. Servis aou, maloya aou, sinplisité aou, baro gran rouvèr, madam Baba té donn son tan, son gabié, tout son konésans.

Son dernié léson : lèss son kor prop. Fé in lakèy la mor. Son vi té anmayé sanm la mor akoz la vi la mor sé in sèl. Son vi té anmayé èk sat La Rénion akoz La Rénion lé Baba, La Rénion sé péi zansèt, péi Madégaskar, péi la rézistans, péi ti moun Zarboutan.

Mersi madam Baba po léritaz ou lèss po nou. Lé gran, lé san fon. I fo éspéré nou va giny manié ali !
Po tout son lantouraz, famiy, zami, isi é an déor, mi di azot nou tyinbo ansanm.

Eric Alendroit


Kanalreunion.com