Hommage

In pansé pour Dédé

Rasine Kaf

Témoignages.re / 3 octobre 2013

JPEG - 47.6 ko
Photo Toniox

L’association Rasine Kaf lé dan la tristès dépi nou la aprann la mort André Payet.

Dédé, sété in militan kiltirel ke nou koné é ke nou frékant dépi lontan. Li la touzour été dan le konba pou la rekonesans nout lang, nout listoir, nout kiltir, nout dinité tou sinpleman. Li la lé touzour été a lekout de sat i spas dan le mouvman kiltirel parske se li ek dot dalon ke la konstrui le mouvman kiltirel Rényoné, ke la aporté in sans, in direksyon, in manier de fèr osi o mouvman.

André Payet sété in zarboutan nout Kiltir, in larmontrèr la route nout lindépendans politik, lindépendans ki prépar pas sat i gingn, in passeur nout listoir, in charroyer nout mémwar, in parolèr, in fonnkezèr, in filosof osi.

Sé dan le tréfon nout mémwar, dan le kanal nout listoir, dan la vèy nout kiltir ke li la trouvé lo mo, la fason révèy nout konsians é mèt anou dobout, dobout pou sanzé nout manier voir, dobout pour pran nout liberté, dobout pour la rézitans. Kont lo kolonialism.

Mersi Dédé pou tout sat ou lafé pou la Rényon, Rasine Kaf i prézant aou sé respé.

 Rasine Kaf 


Kanalreunion.com