Témoignages - Journal fondé le 5 mai 1944
par le Dr Raymond Vergès

Cliquez et soutenez la candidature des Chagossiens au Prix Nobel de la Paix

Lakey lo sit > Culture > Hommage

Madiba, mi pans pa l’moun i sar obli aou vitman konmsa !

samdi 7 désanm 2013

Yèr matin kan moin la lévé, moin l’aprann dann radio RFI la mor Nelson Mandéla. Dopi in sèrtin koup de tan, demoun téi atann la mor so gran jéan la. Oui Mandéla té in gran jéan é parl dé li l’èr li kite anou pou alé l’ot koté la vi, sé in n’afèr bien difisil. Dabor, pars in pé i pé dir, li parl in jéan pétète pars li osi, li vé grandi ali in pé. In pé i pé di osi, pétète nora té myé antann in pé plis out voi dann tan lo moun l’avé bien bézoin, dann tan li lété dan la jol épi shak instan la mor té i frol ali. Malgré tousala moin la kant mèm désid di mon dé mo i vo sak li vo, mé mi oi pa moin, rès san kozé l’èr in moun konmsa i sava kan mi koné mon parti épi mon bann kamarad l’akonpagn ali a distans lontan mèm... Kansréti arienk pou la jénès bien rapèl son nom é réfléshi in pé dsi légzanp li la lès pou nou.

Mi vé pa parl dsi son vi, pars sak i vé li pé alé dsi internet épi konète an gran é an détay la vi lo ga la améné, pars si demoun i rouv zot radio zot lé sir antann parl dé li omoins dé troi zour. Pars si zot i rouv zot télé moin lé sir é sèrtin zot va gingn rogard tout kalité zafèr konsèrnan ali. Donk, mi sava pa tro anparl son vi mé légzanp li la lès bann pèp an éritaz. Pa solman bann Sid-Afrikin, mé tout bann pèp, kisoi bann Zéropéin, kisoi bann moun i viv dan lo réstann l’Afrik, dann l’Azi épi dann l’Amérik… kisoi bann pèp nonbré, kisoi bann pèp lé pa nonbré. 

Kèl loson ? In loson in kroiyab. Koman li la fé pou rékonsilyé bann blan avèk bann noir, dann in péi rasis. koman li la fé, kan in pé té i réklam la vanzans, pou ankouraj azot dan lo shominn pardon. Lé rar in n’afèr konmsa dann Listoir pars si zot la suiv in pé shomin la libérasion bann pèp, moin lé sir zot i koné koman lé shoz la éspasé dann in bonpé péi mi nom ar pa isi. In késtyonn pardon rant lé z’in épi lé zot ? Pa solman pars lété galman in manyèr pou anbèk dann shomin la libèrté avèk l’égalité. Moin la antann in moun, Frédérick Declerc mi pans, apré rakont koman Mandéla la fé konprann ali lo pardon avèk la rékonsiliason té lo méyèr fason pou la libérasyon, la dékolonizasion intèryèr épi la pé... Mandéla lé mor é moin lé sir in bonpé d’moun i komans solman antann son nom. Si zot té i pé an mèm tan k’antann son nom, konprann in pé son filozofi politik, arèt in n’instan pou réfléshi dsi légzanp li lès pou nou, li lès pou l’imanité. Madiba, mi pans pa i sar obli aou vitman konmsa.

G. Gauvin


Inn modékri, inn ti lavi, inn komantèr ?

signaler contenu


Facebook Twitter Linkedin Google plus