Kan nana in manifèstasion konm sak la fé samdi dann Pièrfon, lé intérésan ékout in pé la radio, sansa agard in pé dann télé... In pé i pé pa s’anpas kritik le Parti. Mé kas pa la tèt ! Vik si zot i pas anou la pomad, sa i vé dir, souvann foi, nou la fé in lérèr kèkpar.

Dann in radio, moin la antann : P.C.R. la roganiz son "grann mès" !

La, moin té pa kontan. Mé moin la kant mèm kalkilé, épi mi trouv, "grann mès", sa i vo in konpliman.

Pou kosa ? Pars lo kèr d’la mès, sé lékaristi. Sa lé bien vré ! É zis apré nana la kominion, linion ansanm-avèk dann in n’afèr idéal. Alor, koué d’méyèr ksa ? Koué d’méyèr kan bann zènn, bann gramoun épi bann vié i kominié ansanm ? Kan sak la vanz yèr i artrouv sak i vanz zordi, é sak va lité domin ? Koué d’mié ké tousa dmoun i rokonèt zot lé dann mèm parti, zot lé solidèr é zot amènn lo mèm konba ? Épi zot i invit tout sak lé déssi bordaz shomin é zot i di vien !

Donkalor, "grann mès" ? Ni pran sa ! Na poin arien pou tiré. Na poin arien pou zété. Bou di kont, dakor pou la grann mès !

Justin