La-ba dann Sin-Pyèr, dimansh dèrnyé, solèy té i done paké... té i fé sho, vèy pa ! Solman, bann gran grèk la réinir la-ba la pa pans, kansréti in foi, lo réshofman klimatik. La-ba, dann Copenhague, nana dépi inn-dé somènn in gran konférans déssi l’éshofmann lo klima, mé bann la Droite la pa antann parl de sa. In bann z’il konm nou, mé pli plate ké nou, lé an danzé, nana in bann pèp lé riskab disparète, mé nouvèl-la la pa ariv ziska zorèy banna. Gouvèrnman fransé, son prézidan an-tète, l’apré boujé pou pa la konférans Copenhague i fini dann fonn kivète, la Droite réini La Rényon i sousyé pa d’sa, lé pa la èk sa. Poitan, zot lé anparmi lo mèm parti k’i gouvèrn la Frans. Zot lé kan mèm o kouran ké nana in n’afèr inportan i éspass dan lo Danemark. Mi éspèr, vi k’sé in bann i doi z’ète byin kiltiré, touléka sé sak zot i prétan, zot i koné le mond antyé l’apré diskite pou déside kossa i fo fé pou ésèy sov l’imanité... mé i diré sa i fé déssi zot konm lo déssi fèy sonz. Paul Vèrgès, Elie Hoarau, Gélita la parti Copenhague, pars La Rényon — sa i doi z’ète nout fyèrté ! — nana son mo pou dir, son lékspéryans pou fé partazé, nana z’afèr pou propozé. La Droite lé pa la-ba, èl lé pa o kourann sa. Mé ousa banna i lé ? Ousa zot i viv ? Déssi kèl planète ? A moin ké zot lé anfèrmé dann in "loft" dépi in bon koup de tan !

 Justin