L’istoir nout pèp rényoné lé pa long. Si ni aksèp l’ané 1663 pou komansé, mèm si komansman té in pé fay-fay, é si ni pran la date nou lé zordi, 2010, dizon sa i fé par-la 350 z’ané. Lé sir, sa i fé pa in bon pé, mé lé konm sa, é lé pa otroman. I invante pa l’istoir in péi, épi l’istoir in pèp… dizon i konstate, i ésplik, i fé la déskripsyon... san rann zoli sak lé pa, san rann vilin sak lé zoli.
Mé kossa k’i ansèrv déguiz la vérité ? I ansèrv de riyin, pars si ou i manti zordi, domin la vérité lé kab ratrap aou. Komansa ? Bin oui, si par égzanp i trouv issi ou byin déor inn-dé maniskri, inn-dé témoignaz, si i fé in fouy épi i trouv z’afèr ou i atann pa, i amontr ou la manti épi ou té i koné ou t’apré sharj de lo. La onte pou ou ! Ala in pé i di ou l’apré révizyonis l’istoir. Lé pa gayar sa, kan i nonm aou konmsa. Tazantan, sé sak i di la vérité zot i pans vréman k’i pass pou révizyonist, é bann gran média la Droite i apiy déssi ou, pars soi-dizan ou l’apré déform la vérité. I fé aryin, pars la vérité, koman-koman va fini par trouv son shomin.
Dé foi, moin lé apré kass mon tète pou sèy konprann akoz in pé i déform la vérité. Mi domann kossa zot la pèr, kossa zot i krin pou fé in n’afèr konmsa. Pou kossa i fé trikmardaz dann nout listoir. Na in dalon la di amoin, arète rèv lo zyé gran rouvèr, pars solon li, ni vé ni vé pa, nout listoir, konm nout kiltir, i rante dann karo la politik. Sansa, pou kossa in pé i vé a tou pri anpèsh fé la MCUR, é in pé i vé a tou pri fé so mézon-la ? Dovine, dovinaye, si la pa sa !

Justin