Sa la pa in zistoir k’i éspas dann in gafourn pèrdi, sa i épas dann in vil i apèl Lille, in vil la Frans, in gran vil la Frans. Sa i éspas pa dann in léspès moiyénaz, avèk demoun pli bousé na poin. Sa i éspas lané 2008 ! Mé alor, bann moun konsèrné lété domi-sovaz, domi-bousé, non, lété bien instruyé, bien sivilizé. Lo boug, sé in inzénièr la pran la rolizion mizilman, lo madam in létidiante, mizilmane dopi étan-pti... Tribinal la anil z’ot mariaz. Lé vré, sa i ariv tazantan, kisoi akoz lo nouvo sansa la nouvèl lété déza marié, kisoi téi port in fo nom, kisoi pou d’ot zafèr ankor... Mé zot, lo tribinal la anil z’ot mariaz akoz lo madam té pi vièrz, épi lo mari té pa kapab aksèp in n’afèr konmsa.

Mé kèl loi la apliké don ? In vié loi i pass pi ? Non ! Lo kode sivil siouplé, dann son artik 180, k’i di konmsa :« in mariaz i pé ète anilé si la tronp de pèrsone, sansa déssi bann kalité prinsipal inn an parmi lé dé pèrsone ». Donk, lété sa lo kalité prinsipal ? La pa son onèteté, la pa son zantiyès, la pa son lamour, la pa k’èl lé travayante. Non, son kalité sé in pti bout manbrane i apèl l’imèn. É lé ga ! Si lété lo boug té pi vièrz ?

Justin