Lékonomi

L’énèrzi dirab la mèr : l’instalasyon in sant pou fé bann z’ésé

Témoignages.re / 29 out 2015

Avann anparl de sa, ni pé kant mèm rapèl pou in pé d’moun ké La réjyon dann tan Paul Vergès lété fine fé instal in n’afèr konmsa shé nou mé konm té i falé kasé, la trap sa l’amenn lo dyab bouyi la-ba é la priv anou avèk l’akor la bann Didier Robert d’in sant pou fé l’ésé bien an avans dsi son tan. Biensir lété pa égzaktoman lo mèm z’afèr, mé té i konsèrn l’énèrzi la mèr é tout fason lété pa nésésèr kass lé n’ot pou alé zète sa sé pa ousa.

Donk lo 25 moi d’août la instal in sant pou fé l’étid bann sistèm pou la prodiksyon l’énèrzi la mèr dirab.

Lo bann sistèm banna i sava étidyé la-ba i port dsi bann z’éolyène off shore (prozé float gen par la sosyété Idéol) épi dsi ban démonstartèr houlo-motèr. Sé sak lo CNRS épi l’ékol santral Nantes i donn konm ransègnman : inn konm l’ot i doi zèr lo sant pou fé lo bann z’ésé, avèk in bidzé plis 20 milyonn l’éro.

Lo site milti-technolozi lé rakordé avèk lo rézo éléktrik zénéral par in kab sou-marine kosto : par-la 8mégawat. Avèk sa, a partir d’moi d’séktanm sar posib konèk tout lo bann sistèm pou tésté dann in sèl zourné avèk tout lo règlomann sékirité. Va gingn fé lo tèst dsi troi démonstratèr EMR (énèrzi marine ronouvlab) an mèm tan..

L’èr ki lé nana tout lo zotorizasyon k’i fo avèk tout lo bann z’aparèy pou la mèr é pou la tèr pou mète o poin dann la réalité lo térin-donk dann i mode opérasyonèl – avèk sa, lo bann démonstratèr épi tout lo ban prototip lé nésésèr dann in promyé tan.
Pou l’okazion mésyé Christophe Clèrgeau vis prézidan La réjyon la anons i sava instal in dézyèm sant d’ésé pou 25 milyon l’éro dann lé z’anviron..

Sak mi romark sé ké lé z’ot i avans é nou nou lé kaziman an pane é konm di lo kont sak i avans pa i rokil. Tousa par l’inprévoiyans é lo mank l’imazinasyon in bann zélu k’i pans zot lé méyèr ké lé zot é zot na mèm poin lo pli pti vizion dsi l’avnir. Mi pans l’istoir va ziz azot !


Kanalreunion.com