Lékonomi

La klime solèr : Oplis la shalèr i tap, oplis nana la féfrésité

Témoignages.re / 29 out 2015

Avèk solèy ou i pé an avoir la shalèr, mé ou i pé osi an avoir l’èr fré. Montpellier la-ba, i an sèrv solèy pou shof dolo épi klimatiz l’imèb banna la poz dési 240 mèt karé bann kaptèr solèr avèk in gran l’éfikasité. Rant promyé oktob ziska lo trant avril lo sistèm i fé lo sho é lo rès l’ané i donn la fré pou la klime. Lo projé la kout 415000 €.

Lo rézilta lé ankourajan mé i kout kant mèm in bon moné.
O bout dé z’ané in biro d’étid, indépandan, Tecsol la drés kabaré lo bilan : lo rapor rant l’énèrji itil é l’énèrji konsomé lé égal 24,5 : sa i vé dir lo sistèm i produi 24,5 foi sak li konsome pou fonksyoné. Lo rannman lé sink foi pli inportan ké la konsomasyon par lo sistèm li mèm par raport sak banna té i éspèr é dis foi pli inportan k’in sistèm tradisyonèl. An pliské sa lo sistèm i pèrmète évite ranvoy dann l’èr Ziska karant tone CO2, par raport lo sistèm tradisyonèl(group froi é pi shodyèr avèk lo gaz). I pé dir ankor sistèm-la la pa bézoin soumète ali par raport lo règloman dsi la léjyonéloz. Pars na poin d’risk trap in maladi konmsa.

In roprosh i pé fé ali, sé ké lo l’invéstisman i kout shèr é konm l’éstrésité lé bon marshé dan La frans lé difisil rann in l’ékipman konmsa rantab pou l’èr k’i lé, mé kan i ogard kansréti l’ékonomi par raport la kantité lo gaz avèk éfé d’sèr ou i pé poz aou désèrtènn késtyon. An partikilyé kosa lé pli inportan ? Protèz la natir sansa protèz lo porte-moné. Mi doi dir pou moin na poin pou ézité. An pliské sa toulmoun i koné in promyé sistèm i kout shèr mé apré i amélyor la mashine épi i diminyé lo pri. De tou tan lé shoz i marsh konmsa. An touléka dsi lo plan téknik sé in réisite.


Kanalreunion.com