Lékonomi

La pèrmakultur, in l’agrikultur san péstisd, san petrol pou in bon rannman é in bon kantité travay pou d’moun

Fabrice Renault 6 août 2015 - Georges Gauvin la mète dann kréol rényoné.

Témoignages.re / 11 out 2015

La pèrmakultur sé konm in bon promès pou l’avnir. I fo in gran kantité travayèr pou donn manzé in bonpé d’moun. San ansèrv bann pèstisid, ni l’angré shimik épi san ansèrv bann mashine agrikol. Konmsa la plantasyon sar rantab é lo paryaz idéolozik bann pèrmakultèr i fé va rant dann la réalité dann l’intéré toulmoun.

JPEG - 87 ko

Promyé Morso :

I-La fèrm lo Bec Hellouin : prézantasyon.

Par koté la vil Rouen, dan La France, nana in fèrm ; li apèl lo ferm Bèk Hellouin. Dann l’androi-la, l’apré invant l’agrikultur pou domin. Sa in ferm bazé dsi la pèrmakulturr, k’ i anprofit tout bann téknik i sort in pé partou dsi la tèr é i nyabou gingn in bon rannman pli for mèm ké bann plantasyon konvansyonèl avèk péstisid, l’angré shimik, mashine agrikol é tout lo tintouin… Dann lo fitir, l’ésploitasyon va pran konm baz in rézo avèk plis san mil pti fèrm rantab épi kapab fé travay in moun plin tan dann in sèl l’inité.
La ferm lo Bek Hallouin lé bati dsi in ptit il. Tèrla mèm i pé trouv la ferm Perrine avèk Charles Hervé, in sinkantène kilomète par raport la vil Rouen dann lo départmann l’Eure. L’androi-la, bann kanar - i di sa bann kourèr indien – in bann z’animo k’i manz pa bann kiltir, mé k’i lèv tazantan la tèt pou alé anval inn-dé limas. Dsi lo robor l’étan nana in bann pti kalimé banbou é zot déstin sé d’ète broiyé pou lo l’anpayaz la tèr pou anpèsh bann mové zèrb pousé é pou fé rès la tèr fré é an mèm tan dékonpoz konm konpost. Le bann ti-bourzon (i apèl sa bann jenn pous) i vann dann bann réstoran parizienzétoilé.
In pé pli loin néna bann pyé d’boi, épi bann ti buison i donn bann frui. An pliské sa, nana bann pyé z’aromate épi bann pyé zerb médisinal pou fé tizane sinp épi vré médikaman. Tousa lé protézé kont lo van dominan par in rido pyé d’boi diféran grandèr Lo moun sak la donn l’idé dsa, i ésplik :
« Nou la désid mète an plas in bann pti milyé natirèl k’i inflians lé z’inn par rapor lé z’ot avèk l’itilizasyon la matyèr organik(…) in sort kokon pou la natir vivant é bien protézé. »
Boudikont, rant bann kiltir maréshèr, lo zardin-foré, lo bann basinn d’lo, lo bann patiraz, bann téras kiltivé, épi lo vèrzé ; la fèrm lo bèk Hallouin i okip zordi in sirfas 20 éktar.

II-In prodiksyon an kantité, an varyété, épi an rantabilité..

Dann son fèrm Charles i rosanm in l’avantiryé pou la konkète la nouritir pou l’avnir. Kan li té fini bate karé dann lo mond antyé dsi in bato-ékol li la akos l’androi lo bèk Hallouin an promyé pou sèy donn manzé son famiy, son madam, son zanfan épi li mèm. Koméla, li plant plis mil kalité légime, frui, bann z’ aromat épi bann zèrb, pmédisinal. Shak somenn li fé soisant panyé légime pou lo moun son l’androi rant Paris épi Rouen. Li vann osi son prodiksyon avèk in magazin an gro. Arzout ankor sak l pou bann réstoran zétoilé dann Paris. Pandann tan-la in shèf kuizinyé i fabrik konfitir, la sos pou la vent avèk domoun sir plas… Boudikont apré dizan l’androi la fine transform an modèl pou tout sak i pratik la pêrmakultur(agrikiltir pèrmanant)..
Finn moi d’avril, é dopi komansman l’ané, la fine fé tourn kat foi bann plantasyon. Dsou la sèr, nana poiron, salad, karote an kantité. Fèv, i grandi pou vnir kaptir l’azote pou fé grandi lo salad k’i kour dsi la tèr épi k’i anpesh mové zèrb pran la plas… Dann la fèrm lo bèk Hellouin lo bann plantasyon i viv an sosyété : na poin lo ran pou sépar inn a l’ot karote, ponm de tèr, salad mé plizyèr varyété légime pou korésponn avèk lo bézoin manzé suivan l akalité épi la varyété. Lé z’inn é lé z’ot i pouss inn par koté l’ot é lé z’inn i nouri lé z’ot… An déor bann légime i donn vite-i di zot lé prékos – i pous dsi in bite « sho » par raport lo fimyé shoval i mète anndan épi dosi la tèr. I transform a li an fimyé diréktoman dsi la bite é sa i pèrmète shof in pé la tèr pou gingn rékipèr inn-dé dogré par raport lo fé fré l’ivèr.

III-In fèrm bien avansé dsi la késtyonn permakultur.

Charles i ésplik li émite in pé la natir, lo déshé pou inn sé in rosours pou l’ot… Ala pou kosa i fo trouv lo méyèr pozisyon posib pou lé z’inn par rapor lé z’ot é sa sé in n’afèr prinsipal. La permakultur nana konm bi d’arnouvèl bann milyé dann z’ot divèrsité épi z’ot dépandans par rapor bann éko-sistèm, lé z’inn par rapor lé z’ot. Ni aport in maksimom lo soin pou lo bann sol konmsa zot lé pli vivan, pli fèrtil. Lo bann bite permanant avèk in tèr k’i rotourn zamé, k’i fouy soman an sirfas, mé k’i anrishi firamézir san arété é ni fé ansort li raprosh lo natirèl. An pliské sa, i pran pa mashine pou vni fé lo travay.
Dann la fèrm lo Bec Hellouin, i tiliz in traktèr arienk pou sharoy fimyé dopi l osant ipik ziska l’androi i ansèrv dé li. Komansman té i ansèrv in shoval pou artourn la tèr ziska momandoné l’avé pi bézoin pou rotourné par rapor lo bann tèr i aneishi an pèrmanans... Pou Charles k’i bouj dann son bitasyon avèk son brouète avèk son matéryèl li la bézoin pou travay dann son zou.
La permakiltir I baz dsi la konésans é par la-mèm li lé pa parèy l’agrikiltir konvansionèl, klasik si zot I vé, konm ni koné aèl zordi : avèk lo l’agrikiltir di ”modern” ou i rosoi in mail pou dir aou nana tèl bébète, mète tèl produi. La boul lé dann out kan ! Dann désèrtin ka kan l’afèr lé séryé la shanm d’agrikiltir i donn aou lé z’ord. Aou dé réspèk lo zord !

Dann la fèrm lo Bèk Hallouin i tiliz prèské pa pétrol, moins ké dann l’agrikiltir « konvansyonèl » moins mèm ké dann l’agrikiltir biolozik. Dann l’agrikiltir konvansyonèl pou donn in kalori manzé i fo dis – douz kalori l’énèrzi fosil. Lo bio i ansèrv moins l’énèrzi fosil mé i ansèrv in bonpé mashine dann la bitasyon. Pou la permakultur moins pétrol mé plis travay avèk la min, dan lo fin, konmsa dsi lo lon tèrm i konsèrv bien la biodivèrsité dann bann sol. L’agrikiltir klasik i sèy an avoir in rannman vitman-vitman. La permakultur i pran son tan. Lo bi d’lo travay sé ké out bann z’anfan i pé anprofite lontan lo travay ou la fé dann out vivan.

(la pankor fini)


Kanalreunion.com