Kan in linz blan la tashé, i gingn fé vnir ali blan : pou sa, i tranp ali dann lo zavèl. I zavèl ali ! Dann déssèrtin péi, déssèrtin moun i trouv zot lé tro fonsé, alor zot i pass-pass produi déssi zot. Zot i zavèl azot ! Mé soman, mi pans pa sa i shanj azot an gran, mi pans pa sa i shanj z’ot kultur.

Dann tan départman, dann tan la guèr froide, dann tan lassimilasion, in pé la pans téi gingn lav nout tète par anndan épi arfé a nou, konmsa ni obli kissa ni lé, koman ni koz, kossa ni manz, nout manièr pou ète kontan, ou bien tris, pou kossa ni pé ète bandé an trann-sis, koman k’ni ème, koman k’ni viv, sak i plé anou, épi sak i plé pa nou.

Koman-koman, nou la ardrèss lo rin, nou la armète a marsh déboute, épi nou la fé oir ni bouz ankor. Mèm si in pé la rondi la boush an déyèr, volay l’arète dir bèr, épi la di beur. In pé la pans na poin lavnir pou la rénionité.

Astèr la rénionité lé la, bien solid, bien korporé, dir koman barmine, inganm é tout. La lang kréol lé vayan, si tèlman vayan : li la fé son rantré dann la konstitision konm bann lang rézional. Dann salon bal, i dans séga, i dans maloya ziska épi bann nouvo mizik i marié bien sanm nout lang...

I zavèl pa la kultur in pèp ! Fransh vérité.

Justin