Dann l’Amérik la-ba nana in gran sosiété l’asirans. Kan i di azot gran, sé gran pou vréman ! Solman, konm di kréol, oplis lé gran, oplis lé kouyon. Oplis lé gran, oplis i fé trikmardaz, i gingn larzan virtièlman mé pa an vré. Alors, avan fé fayit, zot la kri sokour : zanfan i plèr pa i gingn pa tété. Sa lé bien vré, mon kouzin ! Bien sir,gouvèrnman, la gonf z’ot pla !
Solman bann dirizan, kan zot la vi toussa larzan, zot la mazine, zot lavé in séminèr an rotar. Par l’fète, zot i koné kossa i lé in séminèr ? Moin, pèrsonèl, mi koné pa, mé i prétan dir. Sa in rénion oussa i sava bien manzé épi i di sé pou travay. Sé pa si lé vré ?
Donkalor zot la fé in gran séminèr épi zot la dépans kat-san-karant-é-in mil dolar pou manzé, boir, bate karé, zoué kazino. An parmi vinn-troi-mil dolar lo soin pou rann zoli demoun vilin. I apèl sa léstétik !.
Pandan s’tan-la, nana 2 milion z’amérikin, la kaz té sézi, lé kaziman dan la ri, in bon pé milion demoun i gingn pi pèy z’ot sékirité sosial... Anfin, la routine ? Bin, sa i fé pa arien, vik nana in pé i kontinié fé la fète : zot i mank pa de rien ! Zot nana z’ot sakaf, mi diré z’ot bèl-gran sakaf... dizon z’ot grann bouf.

Sakaf, sé manzé an malgash - trikmardaz sé z’afèr loush.

Justin