Kombien pov nana La Rénion ? Solon lé ka, suivan la otèr ou mète la bar. Si ou pran la bar banna la fiksé pou La Rénion, sé in moun ki gingn moins 350 euro dann in moi. Dan sé kondition nana in moun dsi kat lé pov.
Kissa lé pov dann La Frans ? In moun i gingn pa plis 774 euros dann in moi. Si i pran lo shif La Frans, nana in pov dsi dë dann nout péi La Rénion.

Alor in moun son finn moi i tonm lo sink kan li la pi in sèl katsou dann son posh, kan li gingn mèm pi pèy in euro pou alé médsin, li lé pov, li lé pa ? Lé dir pou réponn in késtion konmsa, mé mi pé dir azot i fé pa bon èt son plass.
Sak moin lé sir sé k’bann pov, nana plizanplis issi mèm, épi in pé partou. Rish ossi, nana, épi zot lé plizanpli rish é zot rishès lé plizanpli insolan, issi mèm épi déor épi in pé partou dann péi étranz.

Dizon moin la poz késtion ! Alor, ala mon répons :
Promièrman, in blan pov, i vo dë noir pov (blan èk noir, manyèr kozé La Rénion) !
Dézyèmman, pou défini in pov, mète aou son plas si ou n’a kouraz ! Éya ! Lé bien difisil èt in moun, in sinp moun dsi so tèr-la.

Justin