Na défoi demoun i di n’inport de koi, ziska bann bétiz pli gro ké zot tète, é la plipar d’tan, i diré zot i rann mèm pa zot kont. Sé lo ka kan in pé i di konmsa, zot i oi pa pou kosa va amontr la lang kréol dann l’ékol. Didier Robert, in moun instruyé kant mèm, mé sirman pa kiltivé, la di dési France Inter, la pa bézoin i amontr kréol dann l’ékol, vi ké lo marmay i aprann sa dann son kaz, dann son famiy.
Lé ga ! Alon kalkil in kou ! Si, dann tout péi, té i amontr pa dann l’ékol la lang lo zanfan i aprann dann son famiy, kosa n’ora arivé. N’ora pa amontr chinoi dan la Chine, fransé dan la France, z’anglé dann l’Anglétèr, insi d’suit, insi d’suit. Pou l’kou, nora fali trouv in lang pou lékol ! L’èr-la, kèl lang nora amontr dan l’ékol ? Dan la Chine, nora amontr zaponé, vi ké bann ti Chinoi i aprann zot lang chinoi dann zot famiy. Dann l’Anglétèr, nora amontr fransé, vi ké zot i aprann z’anglé shé zot, épi dan la France, nora amontr z’anglé, étsétéra-étsétéra, la ké lo ra. Alon koz séryé !
Si ni konpran bien, bann moun i vé pa i amontr kréol dann l’ékol, sanm pou moin, zot i trouv la lang kréol lé pa asé "bien" pou l’ékol la Répiblik. Pétète zot i vé pa l’édikasyon nasyonal i abès ali pou amontr la lang nout pèp la fabriké. Pars sé kant mèm nout z’ansète la fé in n’afèr konmsa, é lé trist antann in pé ronyé nout pasé konmsa, ronyé nout patrimoine… Pars nout lang kréol, sé kant mèm in boute inportan dan nout patrimoine. Alor, Kréol liki ? Kréol tya-tya ? Kréol kaka ? Pé s’fèr, in pé, dann fon zot kèr, i pans konm sa, pars solon moin, nana in pé i oi nout lang kréol konm in danzé. In danzé, mé pou ki, pou koué ? Pou nout éropéanité... pou nout fransité... pou nout sivilizasyon ké zot i oi dan zot linète albosantrist, si tèlman, dann fon zot kèr, zot i vé sa i disparète pou pa mète an danzé zot manyèr oir lé shoz par lo pti boute la lorgnète, é zot i souète sa i disparète… Oté ! zot la p’asé fé pèr azot par zot mèm !
I prétan dir, in ga té i apèl Gribouy l’avé si tèlman pèr la pli té i mouye ali ké kan li la vi in gro niyaz noir dann syèl, li la sote dann basin d’lo. Mi lèss azot kass in pé zot tète é réfléshi in pé la dsi.

Justin