In pé partou,bann z’éli l’apé konté é arkonté.zot i rash z’ot shové, pou sèy fé in bidjé konm ki fo,konm i di"an l’ékilib".Mé lé dir, koméla gingn fé in n’afèr konm sa. Konm di lo patoi,"la rob titine lé kourte, koup par an-o, alonz an-ba !".Pou toute lé konm sa ?

Oui, pou toute sof inn... sof pou lo nouvo prézidann réjyon. Sé pa si li la roul in rosh épi li la trouv in trézor dessou ? Sé pa, si gouvèrnman la di ali, i sava gonf son pla, donn ali lo pourkoi pou li ariv réspèk son bann promèss li la fé dann la kanpagn zéléksyon.

Lé vré la ariv ali fé in promèss pou in n’afèr déza fine komans réalizé,konm lo pon déssi la rivir Sin-t’ Etyène,épi d’ote zafèr ankor,konm ma ganmèr Bèrte noré di, konm in vré l’injényèr travo-fini. Mé na d’ote z’afèr la pankor fé,é sof mon réspé, mi anpans pa k’va nyabou fé,pars bann shif sa nana la tète dir. Tourn ali konm i vé, roul ali kari sou d’ri,na riyin a fèr...Li lé la, é li lé byin la.

Dann son diskour vantrodi, li la fé bann z’anons, son bann partizan téi fé"Oué !"..Va donn si :"Oué !",va donn sa :"Oué !", va fé si :"Oué !",va fé sa : "Oué !"..étsétéri, étsétéra, la ké lo ra.
Va donn in l’ordinatèr marmay sogonn : "Oué !"..Oué ? Mé akoz pa, pou pèrmète ali byin kalkilé... in sinp kalkilète pou lo prézidan. Sa lé kab ète itil sa !Sa lé kab rann ali sèrvis !

 Justin