I prétan dir, Sarko lé kandida pou z’éléksion prézidan. La pa in nouvoté. Lo sèl nouvoté, sé k’li tard pa pou anons son kandidatir. Samdi, li la fé pas in gran l’artik dann in zournal la droite la-ba dan la Frans. Lo tit ? “Mon bann valèr pou la Frans”. Bien antandi, son bann valèr la pa valab pou bann ti kolon konm nou, pars boudikont, li rod lo pou dan la tèt bann pov, pa dann sèk bann rish. Na mèm in zournal la fé in l’artik dési Sarko lo réaksyonèr.
Na in bonpé z’afèr pou di, mé zordi nou va kontant dir li anons in référandom. In référandom ? Sa i pé èt in n’afèr valab. Konsilt lo pèp ? Sa lé konm la démokrasi an dirèk. Donk i soré bon si i konsilt lo pèp avan alé fé la guèr dan bann péi étranz, avan bès z’inpo bann moun friké, avan siprim boulo in bonpé d’moun, avan sabot l’ékol laïk, dizon nana in bonpé sizé sré intérésan pou konsilt lo moun par référandom. Mé la pa sa li vé li ! Kosa li vé o-zis ? Li vé i konsilt bann Fransé dési l’arzan shomaj.
Shomaz-la na poin bonpé bann rish i gingn sa. La plipar d’moun i toush sa, sé bann ti-kolon... L’èr-la, i komans par di, bann shomèr, sé bann fo-shomèr. I di galman, bann shomèr i profèr pa fé arien, toush zot shomaz é zap lo travay. I di ankor, kan i domann banna si zot i vé suiv in formasyon, zot i vé pa. L’èr-la, inn foi la fine di in pé z’afèr i kol pa pou vrémancèk la vérité, i rod lo moiyin pou siprim z’alokasyon in bonpé d’moun.
Ankor in foi, lé pli fasil atak bann pov ké toush in brin shové bann rish. I paré i apèl sa lo kouraz lo prézidan. Sé sak li di ! Sé sak son bann dalon i di ! Moin, pou mon par, mi di, in kouraz konmsa i pé s’an pasé.

 Justin