Na dé z’androi la Rénion ou i oi sa i bouz, sa i viv. Ou lé forsé romarké lavé konm in lidé fé, in n’afèr d’bien landroi-la pou dmoun viv épi travay. Ou i koné pa bien si lo lidé la sort dan la tète in moun, par li-mèm, sinonsa li la vi dann péi étranz kossa demoun té i fé... Lèr mi di sa, mi pans in landroi konm Le Port, konm d’ot ossi. Si in nafèr lé bien, i fo di li lé bien !

Mé si li lé mol, i fo di li lé mol. Si lo konstriktèr sé in konstriktèr-la-mok, i fo di... Lé ga, tou lé zour, moin lé dann Sinni, épi mi agard tout déga l’apré fé : ou k’i lé bann zéspass vèr, ou k’i lé zardin pou bann marmay promène kisoi èk z’ot momon, kissoi avèk z’ot gro-mèr ? Okilé in gayar larsitéktir, bann kolonad, bann bassin, bann moniman ? Okilé bann zoli koulèr, bann zardin sispandiyé ? Oussa i lé sa ? Na poin, na poin, na poin.

Kossa ! i vé mète demoun dann kaz lapin, épi fé mor azot dézéspoir, la tristèss, la vilènnté, lannuiman ! Kossa, limèb koulèr la prizon la ri ziliète dodi ! Kossa, ki kalité zarsitèk banna la trouvé. Kan sar fini, va arète arienk pou bate atèr, pou arfé an mié, pou arfé an bien. Lé ga, Sinni i vé pa arkomans sak banna la fé dann bann banlié la Frans... Siouplé, kal in kou, épi alon oir in méyèr manièr dévlop la vil.

Justin