Matante zélida la ékrir Justin :

 Mon shèr nové, mon spès salté, pétèt ou i pans pars moin lé i-syin-o, dann mon gafourn, mi suiv pa sak bann malédiksyonn rouj de fon l’apré fèr. In koté zot i di zot i vanj pou fé diminyé lo pri marshandiz donk rogoumant lo nivo d’vi ; in n’ot koté zot i goumant zinpo, konm par égzanp loktroi d’mèr déssi lalkol.
Alor, mi di dann mon kèr nana in n’afèr la pa bon ditou la-dan : si i kontinyé konmsa, goumant inn- bès l’ot, goumant inn-bès l’ot, pou finir lo poi kréol sar o-fé kant mèm, épi lo nivo d’vi lé riskab rès tèl-ke-sé.

Justin la réponn aèl konmsa :

 Mon vyé matant, konm dabitid, ou i oi pa pli loin ké l’bout out né ; pars si i goumant lo pri lalkol, sé pou diminyé la konsomasyon, sé pou amélyor la santé Kréol, sé pou k’zot nana plis la fors pou byin travay ; zot va dépans moins pou alé médsin, zot va mank moins travay. Donkalor, zot nivo d’vi va goumanté, si zot nana vréman la volonté...
Astèr matante, lalkolis, sa in maladi ! Akoz i fé pa kanpagn détéksyon konm pou dyabète, sansa lipèrtansyon ? Akoz i rode pa bann trètman i donn bon rézilta ?
Pou mon par, mi pans pa bann pouvoir piblik i fé vréman lo pli nésésèr ! Dizon, in pansman si in zanm-dé-boi, sa i ansèrv d riyin !

Justin