Samdi dann zournal “Quotidien”, moin la lir in lartik dsi zéléksyon Sint-Sizane. Son tite té intérésan. Téi di konmsa zéléksyon Sint-sizane sé plis k’in zéléksyonn mèr. Pétète sa in tan inportan dann nout listoir zordi, somanké ossi lé pa si inportan k’sa... Soman kan moin la parti lir lo lartik, moin té i pans té in n’afèr bien étidyé, bien aprofondi, mé moin la rès dsi mon fain pars in foi anplis lété konmsi téi vé anparl la finisyon Parti kominis épi téi pran pari kont li, boudikont.
Kroi touzour, mé kont pa tro dsi, pars toultan La Rényon sar dan léta k’li lé, nora touzour bézoin in parti d’rézistans é pou l’instan na arienk in sèl sé nout Parti.
La rézistans la komansé lo zour dé zorèy èk dis Malgash la débark La Rényon l’ané 1663 épi bann Malgash la parti maron toutsuit. Na troisan sinkantan konmsa é lo bann pouvoir kolonyal la zamé gingn touf la rézistans lo pèp Rényoné.
Solman dann lartik moin la di an-o la, lo zournalis i parl in kanal istorik... é pétète in kanal ké lé pa ! Kanal sé lo mo k’i ansèrv dann bann mouvman téroris dann l’Erop. Sof mon réspé PCR la zamé été in parti téroris, la zamé mète a l’ord di zour bann métode téroris. Donk lé pli fasil ansèrv bann zadzéktif kalifikatif nana dann laktyalité déor, san alé rode sak nana dsou, san ésèy konprann sak i éspas dann nout Parti pou vréman épi dann la sosyété rényonèz. Inn èk l’ot, lé anmaré ansanm, sa mi pans. Touléka, Élie Hoareaui la bien di, sanm pou li, lo Parti la bézoin in rofondasyon. In fondasyon i ansèrv pou konstrui in bon kaz solid é pétète lo tan l’arivé pou arkonstrui lo kaz, san préssé, bien solid, bien kapab rézisté i bonpé z’ané ankor, tèl fason k’siklone l’aktyalité i bate pa li atèr. Pars, moin la di, é mi ardi lo pèp Rényoné la bien bézoin in parti Rényoné, pou son rézistans épi son dévlopman dirab. Donk in Parti dirab pou nout dévlopman dirab !

 Justin