Matante Zélida la ékrir Justin :
Mon shèr nové, mon spès salté,
Mi pans bann rouj de fon, konm ou, i doi zèt kontan apré lo vin désanm ni sort pasé. Daoir, zot i majine sé par zot k’in vin désanm komsa lété randi posib. Daoir, zot i pans galman sé in n’afèr i pé ranfors azot dan l’opignon. Pou mon par, mi pans pa konmsa.
Pou koué ? Pars mi oi bien zot kanot l’apré kaziman koulé afors zot lé pa dakor rantre zot. Ekopé, i ansèrv de rien ! Moin lé mèm a dmandé, si l’opignon i done pa zot rézon dsi désèrtin poin, sa lé pa pou asir azot in l’antèrman promyé klas. Majine in kou k’in gran kantité z’éléktèr rouj i mèt a pansé toudinkou ké zot rol lé fini pars, solon l’moun, zot la fine done tout zot kapasité. L’èr-la, pou arpran in kozman bien koni : "Kan la fine tir lo zi dann in z’oranj, astèr i jèt la po !". Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr,
Moin lé bien kontan antann aou dir ké dsi désèrtin poin, parti kominis la gingn rézon. Romark bien, sré in pé difisil, mèm pou nout z’ènmi, ronyé la patèrnité lo parti épi son bann z’idé dési in bonpé viktoir lo pèp rényoné. Pa solman dan la kiltir, mé galman dan d’ot domèn. Kalkil aou bien ! Fé travay out koko ! Sar pa difisil pou fé la romark. Mé sré in pé long pou di tousa zordi. Sé pou sa mi profèr réponn out prédiksyon dsi la mor anonsé Parti kominis rényoné... Dabor inn, la pa zordi solman i anons nout mor ; konbien foi la fine anons sa, alé oir, é nou lé bien vivan. Arzout èk sa, kan tout nout z’analiz i amontr ziska kèl poin nou na rézon, la pa l’èr pou mor, mé an kontrèr l’èr pou viv. Nou la pa in z’oranj présé ! An kontrèr, oplis ni done nout péi, oplis nou nana pou doné. I rès in péi pou dévlopé, lo rès na oir apré !

Justin