Z’afèr lé grav : dofé dan la paye kann. Tangaz i sava pété !...
Kosa l’arivé don ? Koussin légliz Kanbiston la pèrd ? Non va !
Mé alors, pou kossa téléfone portab i mète a difiz bann mésaz insiportab ?
Pou kossa in bann pintad i mète a jakasé dann déssèrtinn radyo ?
Pou kossa so bann la di - la fé, so bann wati-watya ?
Kossa i fé jakas bann jakasèr, mont z’ot gaz, mèt an marsh z’ot moulin mové parol ?

La prime mé zami. La prime pou bann moun lé dan lokisité.

Lavé pankor di lo règléman, lavé pankor anons ki k’i gingn, ki k’i gingn pa, dézord lété fine pété dann park kanar ! Na in pé té fine gingn pou z’ot grad ! Té fine ramas tout sort kalité zirman, té fine fé maltrèt azot pli ba k’lo shyin ! An parmi, sak zorèy la sif plis nana bann érémis.

Oui, mé si l’avé aplik lo R.S.A., si l’avé donn sa bann shomèr é pa détourn ali pou sak i travay. Si l’avé mèt tou lé moi in moné déssi z’ot pti moné pou lo travay zot noré fé. Si zot osi, zot l’avé lèv gran matin pou bouloté. Tousa dispit, kozman initil, zirman k’i dégrad nora pa égzisté !

Nora pa égzisté si gouvèrnman lavé pa panik konmsa, si l’avé pa dévir son do avèk in loi li-mèm, la fé !

Justin