Moin l’avé konm romarké, souvan dé foi, bann shif i vé pa di aryin dan la boush déssèrtin moun, mèm sak nana in bon pozisyon dan la sosyété, mèm sak i okip gran-gran fonksyon. Dann sobatkoz déssi antenne, moin l’avé romark sa é kan la fé sète RFO, moin la di dann mon kèr, si i arkomans konmsa, mi tinn lo télé... pars sa in n’afèr lé fatigan pou vréman. Sé konm si lo boug i pran d’moun pou dé z’inbésil… sé konm in mank réspé pou la pèrsone i gard télé. É la arkomansé, ankor in foi, mé so foi issi lo pézidan Vergès la pa lèss fèr, é l’éspéktak té i vo lo voiyaz. Shak foi le Didier Robert té anvoy in kozman mantèr, sansa in shif lé pa vré, prézidan té i ropran ali, si tèlman k’son figui té i ramas. L’èr-la moin la konpri pou kossa li é i di i fo pa intéronp ali... li té i vé di, lèss ali manti san dir aryin. La pa ariv in foi, ni dé foi, mé kék foi épi dann toute konpartiman lo déba : kisoi dann lékonomi, déssi l’anploi, déssi la késtyonn tourism, li té i fé tap déssi son doi. Si tèlman ké Vèrgoz, li ossi, la gingn lo gou, é li la komans zok lo zoli garson. Domaz zistoir Pinokyo lé pa réèl pou vréman... zistoir lo pti pantin lo né té i alonz shak foi li manti... sansa baya ! Mazine in pé la grandèr lo né Didier Robert kan lo l’émissyon nora té fini !

 Justin