13 mé 2009
Sa in zistoir i éspas na déza in pé d’tan. In minis la Répiblik lété an voiyaz La Rényon. Son nom :"Lepinsèc" si mi tronp pa, in minis sosyalis sa !
Prézidan Komité la kultur i fé in diskour épi li dénons èrèfo-zé pars dann tan-la nout lang kréol lété intèrdi dann radyo konm dann télé (*). Dann tan-la, moin la byin di !... Donkalor, li koné lo boug lé Breton, alors li di in kozman in bonpé dmoun i koné, dann tan la lang bann Breton, èl ossi lété intèrdi : « Il est interdit de parler breton et de cracher par terre ».
Mi koné pa si lo boug la vni rouj, pars mi pans koulèr la po boug-la té rouj natirèlman. Sak mi koné, sé k’lo minis la vni oir prézidan Komité la kultur épi la di : « ça ne se passera pas comme ça ! ».
Donk pou moin, li té i sar shof zorèy bann résponsab…
Lo tan la passé, mé lo minis la pa fé aryin. Dizon pars in minis sé aryin k’in minis ; épi lo tan i pass vite, na poin lo tan fé sak ou i vé !
Aprésa, nout lang kréol la fé son shomin, ti-lanp, ti-lanp. Li la ranport inn-dé viktoir, li la konte inn-dé kou d’kongn. Zordi é dépi in koup de tan, li lé rokoni konm lang réjyonal.
Sa in progré, mé sa la pa ariv konmsa, san forsé, san k’in pé i pèrd z’ot somèy pou ésèy mète nout lang é nout kultur anlèr.
Mé pou in pé, sa la pa bon... In provizèr, dann in lisé Sin-Zozèf, i sort pa ékri in proféssèr, pou dir ali : dann in rényon, i koz aryink fransé.
Sa i éspas sète ané, sa i éspas La Rényon. Lé trist in n’afèr konmsa pars kan mi sar la kaz demoun, pou mon par, mi krash pa dann zasyèt ! In pé i ézite pa fé sa, zot !
Justin
(*) Prézidan Komité lété Robert Gauvin, si mi tronp pa.
© Copyright 5 mai 1944-2012 Témoignages | Tous droits réservés.
Reproduction, even partial, of the contents of pages on this site without prior consent is strictly prohibited (short citations are permitted by French law for comments and criticism, as they are strictly concurrent, and are specified the original author and the Internet link to the source page).