Dann l’Érop, la-ba nana in péi i apèl Danemark. Péi-la té pov par-la la fin diznévièm sièkl. Son lélvaz téi fé pitié, son bann vash téi donn dé lé dizon konm fay kabri, son bèr lété si tèlman mové kalité, k’té i vann ali dann l’Angleterre pou grès bann mashine. Koméla, é dépi in bon koup de tan, Danemark sé in péi rish. Son lélvaz lé konm sète bann péi sak lé pli avansé. Son modèl sosial galman lé avansé. La rishès par pèrsone lé an parmi sète bann péi sak lé pli rish déssi la tèr.

Koman in n’afèr konmsa la spassé ? I di banna la fé z’ot révolission. Bann plantèr la groupé dann kopérativ, pou lélvaz, pou transform bann produi, pou vann bann produi. I di mèm, bann plantèr i gingn pré d’katrovin pou san la rishès zot i fé. Sa in bon rézilta, in rézilta pliské bon !

Bin nou, issi La Rénion lané 2008 : kossa bann plantèr kane i gingn kan zot l’apré transpiré dann plantasion ? Près arien, vik i di zot lé riskab pèrd larzan déssi kane zot va amène lizine. In pé i di, ui san éro par éktar (ha). I sava pa loin èk sa, i sava pa loin ditou !

Bann plantèr la poin z’atou dann z’ot min. Z’atou dan la min gro-blan, bann l’Izinié. Kansa, va partaz kart-la, konm k’i fo ?

 Justin