La fé in plan pou soubate kont lilétrism : té i falé fé in n’afèr konmsa, akoz nana tro d’moun i koné pa lir épi ékrir La Rénion : 120.000 pèrsone an parmi tout sak lé an az pou konète. Lé bon ossi bann moun inportan i asosyé pou so lite-la. Soman, dan la bann, moin la vi lo réktèr, sé pou sa moin na la krintiv in n’afèr.

Amontr demoun lir épi ékrir, dakor, mé dann kèl lang ? Fransé la bate bann zilétré atèr kan zot té i sava lékol. La prèv ? Zot i koné pa lang-la, zot la zamé gingn aprann so lang-la. Arbis sa ? Dizon, in bann kok batu, zot i vé fé rant o ron. Lé pa a fèr ! I sar gingn galo ankor in kou.*

Épi, i vé arkomans so tik-tak-la ! Zot i vé mal kadik, mal vévé, dépitasyon i monte dsi banna. Arète èk sa ! Alfabétiz an kréol, aprann lir an kréol, aprann ékrir an kréol. Aprésa, sar pa malizé aprann demoun fransé. Sof si nana in réaksyon d’rozé konm kan i mète in n’afèr kontrèr dann out kor. Zot la zamé mazine déssèrtin marmay la kour i vé pa sa, i arfoul sa, lé ragoulé avèk sa ?
Oté, lé ga ! Na poin in kalité la siklosporine pou anpèsh in rozé kiltirèl !

*errare humanum est, sed perseverare diabolicum.
Lérèr, toulmoun i fé, soman si ou arbis... sé k’ou rod boubou pou out kor !

Justin