So matin, moin la lir dann zournal in kékshoz lé riskab fé tonm in bon sindika plantèr déssi son ba d’do, fé tourn son bil, fé mont son gaz. In pé plis lé riskab gingn lapopléksi. Akoz sa ? Koman, zot i lir pa zournal don ? Sansa zot i lir pa kan la poin foto ? Pétète zot i profèr lir rézilta fotbal...Tansyon ! Sak mi di la lé sérié, sa ! Dépi tro lontan, bann kapitalis i manz la lène déssi l’do bann plantèr, i sis lo san !
A bon ! I diré moin la antann in malfondé apré di dann mon do : « Ki bate di bèr, lish son doi ! ». A bon ! Moin la mal antann ? Lé ga, rapèl azot, lané 1967 pou sak lavé in pé son konésans, dann tan-la- in sindika, Virapoullé lété lo komandèr, la sign in mové kontra : bann plantèr la pèrd sak zot téi gingn déssi bann sou-produi kann.
Astèr, zot i armète in plan épi la shanm l’agrikiltir épi sindika CGPER lé mèm pa d’dan. Lo bann boug la fine shant mizéréré lo sik épi i rod fé arienk lénèrzi. Mi koné pa si sé in bon zafèr, mé sak mi koné si nout tout i tonm pa dakor, i avans pa ansanm-avèk,... tout i pran lo fon. Si plantèr i plant pi kann, lizine i tourn pi épi lo lénèrzi, lo létanol, zot va rogard dann trou...
Konm di Léonus dann son konvèrsasyon avèk Marta : « Totosh, la pa vré ! »

Justin