Matante Zélda la ékrir Justin :
— Mon shèr nové, mon spès salté,
Mi domann amoin kosa i fo pou kontant azot… ! Mésyé Préfé la vni koz dann télé, épi li la di tout sak Rényoné lé fine gagné dépi k’lo mouvman la komansé. Kan moin la antann sa, moin la pans zamé-d’zamé in mouvman la gingn in bon pé z’afèr konmsa d’in kou. É tanpir k’i sava, tanpir k’i done azot.
Alor, dann mon kèr, mi pans bann rouj-de-fon i koné vréman pa kan z’ot bouzaron lé plin. Tansyon pangar, zot lé riskab an pèrd tout ! É sar mérité !

Justin la réponn aèl :
— Matant, final de kont, kan in moun la-ote i fé zoli kèr, vi kroi a li vou ? Bin, m’a dir a vou : souvan dé foi, lé méyèr tourn la lang sèt foi dan la boush avann kozé ! Lé pli préférab, byin kalkilé avann sign in papyé.
Pou kosa, mi di a vou sa ? Pars manyèr k’i sava, bann moun sak lé pli pov lé riskab gingn moins ké sak nana in pti moiyin, parl pi sak lo pla lé byin gonflé ! Pou linstan, kosa bann R.M.I. i sava gingné ? Kaziman pa gran-shoz ! Kosa bann zétidyan i sava an avoir ? Près aryin ! É bann ti rotrèt ? É bann madam i songn z’ot zanfan tousèl ? É sak nana in ti réstann sédik ? Zéro kalbas la fimé ! Gouvèrnman i pans pa zot ! Zot i kont pa ! Zot lé konm in zéro, la gosh in shif !

Justin