In dalon la di amoin boug-la lé dsi Internet, dann in hamac é li rogard avèk vantardri. Moin pèrsonèl, moin la pa vi é pou dir la vérité moin la pa anvi oir ali. Ali* kissa ? In boug la pass tribinal, é sète-la la kondane ali, in pti pène san konsékans.
Si moin la poin l’anvi oir mèm son portré, la pa pou sak li la fé, pars moun détraké, na poin aryink inn déssi la tèr, é na poin inn solman i fé bann zès déplasé. Donk pa si tèlman pou sak li la fé, mé pou sak li la di dann tribinal, dovan l’moun, pou aprouvankor li na rézon. Kossa li la di o-zis, pou li rovandik lo mal li la fé ? Li la di : « je suis blanc ». Li la di ankor : « Ici ce sont tous des nègres et des putes ! ». Pou konplète l’afèr, li la arzoute : « C’est comme cela qu’il faut faire ! ». É dir ké pou moins ké sa, nana pli d’inn la gingn gro-gro kondanasyon.
I paré lo prézidan la di solman lo boug nana drol manyèr. Oui ! Demoun la di amoin lo prézidan tribinal épi lo prokirèr la pa fé plis ké sa. Poitan zot l’avé moiyin kal ali toute suite... mèm karsèr ali. Alor, pou kossa la pa fé ? Pars li lé blan... sansa pars nout toute sé in bann nèg é in bann pute ? Sansa ankor pars sé konmsa k’i fo fèr avèk nou ?
Éstèr, li trone déssi Internet, fyèr d’li a s’ki paré, konm si, pou li, la sosyété l’avé pa donn ali tor pou vréman, konm si, dann son kèr, li l’avé gingn rézon.

Justin