Mi di pa ké zot i koz pa mé landroi k’moin i lé, mi antann pa zot. Mi antann pa zot parl déssi la kriz ; mi antann pa zot parl déssi la késtyonn shomaj, déssi lo nivo d’vi demoun k’i dékaniy plizanplis. Zot kissa ? Bann politik ? A non pa toute pars si mi antann souvan bann parti l’Alyans, épi l’Alyans kont la povreté, sansa ankor l’AJFER, nana dé konpèr mi antann pa ditou. Inn sé l’UMP, l’ote sé Parti sosyalis, sof pou di bann z’afèr insignifyan...
Pou kossa i antann pa zot déssi bann vré problèm bann Rényoné ? Poitan sa in bann moun i èm kozé sa ! I diré mèm sa i fé plézir azot kan zot i koz. Mé shomaj avèk la povreté, plis ankor bann problèm bann ti-kolon La Rényon, i diré sa i korsh zot boush. Poitan, si mi tronp pa, zot lé résponsab in sityasion konmsa. Ansanm-avèk zot l’arète la MCUR. Ansanm avèk zot la antèr lo tram-train. Lé dé konpèr ansanm la propoz in bann solisyon inpossib konm lo dé mil bis. Parti sosyalis, kantali, té pou in spès anfibi i roul déssi la tèr, i roul dann raye si i fo... la pa di si i naz dann lo.
An atandan shomaj la goumanté, la vi la anshéri, é moun-a-tèr i rèss plizanpli atèr. Moun anlèr, zot pla i gonf. L’èr-la, lo tan i pass, i oi pa in débu d’komansmann solisyon. Bou di kont, lé a dmandé si so bann la, i konsidèr azot konm résponsab dovan lo pèp rényoné. Touléka, i fé pa l’èr, mé pétète la pa sak zot i vé. Pétète zot i pans kontinyé tiliz lo pèp konm marsh-pyé pou zot karyèr é kontinyé roul bann Rényoné dan la farine !

Justin