Kan Jupitèr i vé bate in moun a tèr, li komans par fé pèrd lo moun la moral. Donkalor, an fransé, "la raison".
Sa lé byin vré, pars apré, le moun la pa bézoin zènmi, ali-mèm son zènmi, li-mèm i détru ali tousèl...
Pétète, ni pé dir lo mèm z’afèr pou la piblisité : èl i fé kroir aou in z’afèr lé bon, lé ékstra, lé sipèr, lé spèr-ékstra. Mé li donn aou in son, konm dé koi, out manyèr fé, out manyèr manzé, out manyèr abiyé …la pa bon ditou !

Pou la Rényon, la pa mèt lontan pou fé pèrd nout konfyans dann nout manyèr viv épi kroir manyèr viv katalog, grann sirfas, sinéma, télévizyon… té sa k’i fo.
Poitan, lé pa vré toultan, pou tout z’afèr. In pé i rokonète dé foi : lé pa si tèlman bon pou nou, i pé mèm fè mal anou. Solman alé aou, batay kont larzan…si ou i gingn !

Akoz mi di sa zordi ? Akoz mi fé mon modékri la-dsi ? Pars, mi sort antann mésyé Ratenon, apré dir k’i fo pa mète dann la list bann produi COSPAR i vé k’i diminyé lo pri, in bann kékshoz pou détruir anou, pou fé d’tor nout kor.
Pars si lo pri i bès, pou déssèrtin produi lé pa bon, lé mèm danjérab, demoun v’ashté an kantité é rovoir la bone santé !
La bès bann pri ? Oui, mé tansyon pangar !

 Justin