Na poin lontan, prézidan la Réjyon la fé vote par son majorité in projé d’route an krorish sis voi. Kan bann konséyé l’Alyans la dmann ali avèk kèl larzan li prétan fèr in n’afèr konmsa, si tèlman gran, si tèlman riské, si tèlman faraonik, li la réponn larzan lé la, sé larzan protokol Matignon ; Anfin, sé larzan Paul Vergès la parti négosyé. L’èr-la, li di, va arsign in nouvo protokol la finsyon moi d’aout.
Na in drol z’afèr la-dan, sé fé vote in n’afèr avèk in pri, in date pou komansé, mé san savoir si lé possib, é si lé possib… konbyin va kouté é kansa sar paré pou komansé. La pa étonan dan la boush in moun i déside La Rényon i sava kapar kinz pou san bann touris i vyin Maurice, épi anbosh vin mil travayèr an plis la-dan. Koman va fé ? Konbyin larzan va mète la-dan ? Kèl shans nana d’ariv fé in n’afèr konmsa ? Pèrsone i koné pa, mé i sifi d’dir, i sifi d’fé tourn moulin la blag. Pou lo rès, va oir apré.
Mé sa protokol Matignon-la, sa in n’ote afèr séryé sa. Pou kossa ? Pars i di dann l’aktyalité la kriz la pankor fini. Pars i di ossi l’Eta i doi bonpé larzan bann Konsèy zénéral é li la poin l’intansyon péyé. Mé sirtou, i di la Frans nana tro dète, é i fo konomiz san milyon l’éro dann dé zan. Si moin lété prézidan la Réjyon, mon shévé nora blanshi. Donkalor, kalkil in kou gouvèrnman i di li sign pi. Kalkil in kou li di li na tro difikilté. É si i réspèk pa la fin moi d’aout ? Si i romète sa pou l’tan kok n’ora lo dan ? Si i ranvoy sa pou la sin glin-glin ? Mazine in kou, konm di lo konte, si i ranvoy sa in date i tonm la mi-aout an mé ? In pé, figuir va assir.

Justin